नेपालसहित विश्वका धेरै देशमा अहिले जाडोको मौसम चलिरहेको छ । यो मौसमले ठूलालाई मात्रै हैरान गर्दैन, नानीबाबुहरूलाई पनि धेरै समस्यासँग जुध्न बाध्य बनाउँछ । यस्तो अवस्थामा नानीबाबुहरूलाई जाडोबाट बचाउनु अत्यन्त जरुरी हुन्छ । विशेष गरी पाँच वर्ष वा त्योभन्दा कम उमेरका बच्चाहरूलाई जाडोको मौसममा धेरै सावधानी अपनाउन आवश्यक हुन्छ ।

जाडोको मौसममा केही उपाय अपनाएर तिमीले आफ्ना साना बच्चाहरूलाई न्यानो र सुरक्षित राख्न सक्छौ । जाडोको मौसममा पाँच वर्षभन्दा कम उमेरका बच्चाहरूमा बढी समस्या र जोखिम देखिन्छ । ब्रिटेनको नेसनल हेल्थ सर्भिस (एनएचएस) को सल्लाहअनुसार साना बच्चा र नवजात शिशुहरूलाई जाडो र चिसोबाट जोगाउनका लागि एकभन्दा बढी लुगा लगाइदिनुपर्छ ।

रातिको समयमा उनीहरूलाई हलुका तौलका सिरक ओढाउनुपर्छ । तर, यो ध्यान दिन जरुरी छ कि शिशुहरूलाई रातिको समयमा धेरै न्यानो कोठाको आवश्यकता हुँदैन । उनीहरूका लागि १६ देखि २० डिग्री सेल्सियसको तापक्रम उपयुक्त मानिन्छ ।
धेरै गर्मीले शिशुहरूको अचानक मृत्यु अर्थात् एसआईडीएस (सडन इनफ्यान्ट डेथ सिन्ड्रोम) को कारण बन्न सक्छ ।

जाडो मौसममा तपाई आफ्नो शिशुलाई बाहिर लैजाँदै हुनुहुन्छ भने उसको टाउकोलाई न्यानो कपडाले ढाक्नुपर्छ । यसका अतिरिक्त उसलाई न्यानो राख्नका लागि पञ्जा र मोजा लगाइदिनुपर्छ । गाडीमा यात्रा गर्दा सुरक्षा उपायका रूपमा आफ्नो बच्चालाई थोरै पातलो स्वेटर वा कोट लगाइदिनुपर्छ ताकि उसलाई सिट बेल्ट बाँध्न ठाउँ मिलोस् । यदि आवश्यक छ भने सिट बेल्ट बाँधिसकेपछि उसलाई सिरक ओढाउन सक्नुहुन्छ । तर, जब गाडीबाट ओर्लेर घर वा कोठाभित्र गइन्छ, त्यसपछि सिरक हटाइदिनु पर्छ ।

बिबिसी हिन्दीबाट अनुवादित सामग्री ।