पोखरा ।
पोखरा महानगरपालिका वडा नं ६ मा रहेको उपकार बचत तथा ऋण सहकारी संस्थाले १६ औं वार्षिकोत्सव ज्येष्ठ नागरिकलाई सहयोग गर्दै मनाएको छ । सहकारीले पोखरा ६ मा रहेको शुभकामना ज्येष्ठ नागरिक पार्कलाई १ लाख बराबरको भान्सामा प्रयोग हुने सामग्री वितरण गरेको छ ।

सहकारीका अध्यक्ष सूर्यनाथ पहारीले सोमबार पार्क परिवारलाई सामग्री हस्तान्तरण गरे । कार्यक्रममा वडा नं ६ का वडा सदस्य वासुदेव बरालले ज्येष्ठ नागरिकका लागि आवश्यक सेवा र सुविधाको विकासमा वडा कार्यालयले सक्रिय भूमिका खेलिरहेको बताए । उनले ज्येष्ठ नागरिकको अधिकारको संरक्षण र प्रवद्र्धन गर्दै उनीहरूको अनुभव, सीप, र ज्ञानलाई राष्ट्रिय विकासमा समाहित गर्न योजनाबद्ध रूपमा लाग्न आग्रह गरे ।

कार्यक्रमका वक्ताहरूले ज्येष्ठ नागरिकले परिवारमा पाउने सेवा, सुविधा र सम्मानमा कमी देखिएको महसुस भएको सुनाए । अध्यक्ष पहारीले सहकारीले सामाजिक उत्तरदायित्व अन्तर्गत विभिन्न कार्य गरिरहेको स्मरण गर्दै ज्येष्ठ नागरिकको हकहितको संरक्षण गर्दै उचित सम्मान दिनु आवश्यक रहेको बताए ।

वार्षिकोत्सवको अवसरमा समुदायका ज्येष्ठ नागरिकलाई सहयोग गर्न पाउँदा आत्मसन्तुष्टि मिलेको उनले बताए । कार्यक्रममा नागरिक समाजका कास्की पूर्व संयोजक विष्णुहरि अधिकारी, सहकारीका उपाध्यक्ष सुन्दरराज पहारी, सचिव कुष्णकुमारी पौडेल, ज्येष्ठ नागरिक सदस्य लोकराज पहारी र पार्क उपाध्यक्ष कुन्ता अधिकारीले पनि बोलेका थिए ।