पोखरा । गण्डकी प्रदेश सभाको हिउँदे अधिवेशन माघ २१ गते बस्ने भएको छ । मंगलबार बसेको मन्त्रिपरिषद्को बैठकले माघ २१ गते संसद बैठक डाक्न प्रदेश प्रमुख समक्ष सिफारिस गर्ने निर्णय गरेको छ ।

प्रदेश सभाको बर्खे अधिवेशन असोज ८ गते अन्त्य भएको थियो । प्रदेश सभाका विषयगत समितिमा २ वटा विधेयक विचाराधीन रहे पनि यसबीचमा सरकारले थप विधेयक दर्ता गराएको छैन । मुख्यमन्त्री सुरेन्द्रराज पाण्डेले हिउँदे अधिवेशनमा कम्तीमा पनि १० वटा विधेयक पारित गर्ने गरी सरकारले तयारी गरेको सार्वजनिक लेखा समितिको बैठकमा केही अघि जानकारी गराएका थिए ।

एकल अधिकारका सूची र केही साझा अधिकार सूचीमा रहेका विषयमा समेत विधेयक बनाएर सदनमा लैजाने तयारीमा सरकार छ । धेरै विषयहरुमा संघले कानुन बनाउन बाँकी रहेकाले प्रदेशले कुरेर बसेको अवस्था छ । बैठकमा मुख्यमन्त्री पाण्डेले भनेका थिए, ‘संघले पछि बनाउने ऐनसँग बाझिएमा स्वत अमान्य भइहाल्छन्, माथिको कुरेर बस्दा हामी पछि परिरहेका छौं ।

त्यसो त प्रदेश सभाबाट पारित भएका ५ दर्जनभन्दा बढी कानुनमध्ये अधिकांश कार्यान्वयनमा आउन सकेकै छैनन् । त्यसतर्फ प्रदेश सभा र सरकारले ध्यान पु¥याउन नसकेको सरकारकै प्रतिनिधिहरुको स्वीकारोक्ति छ ।