पोखरा ।
महाकाव्यकार माधव वियोगी काठमाडौंमा पुरस्कृत भएका छन् । शनिबार मुक्तिनाथ दर्शन साहित्य समाजले वियोगीलाई सम्मान गरेको हो ।

छन्द बचाऊँ अभियान २०५३ र महाकाव्य लेखन अभियान २०६० को सञ्चालनद्वारा छन्द र महाकाव्यको उन्नयनमा योगदान दिएवापत उनलाई सूर्यबहादुर केसी स्मृति नेपाली साहित्य उन्नयन पुरस्कार प्रदान गरिएको हो । कार्यक्रममा साहित्यकार भूवनहरि सिग्देलले भाषा, साहित्यको विकासमा तत्पर रहेका स्रष्टाको सम्मान गरी मुक्तिनाथ दर्शन साहित्य समाजले उल्लेख्य काम गरेको बताए ।

महाकाव्यकार वियोगीले काव्य संस्कृतिका रूपमा रहेको छन्दलाई बचाउन र थप कृतिको सिर्जनाका लागि आफूलाई सम्मानले उत्साह थपेको जनाए । समारोहमा नरनाथ लुइँटेल, विवश पोखरेल, विदुर अधिकारी, केशवराज आमोदी, सिर्जना खनाल लगायत पनि सम्मानित गरिएको छ ।

समाजका अध्यक्ष कलानिधि दाहालको अध्यक्षतामा भएको कार्यक्रममा हरिभक्त सिग्देल, भैरवी भूगोल लगायतले बोलेका थिए ।