नन्दकला दमै नेपाली
प्रदेशसभा सदस्य नेकपा (एमाले)

प्रदेश संरचना संघीयताको उपज हो । मलाई के लाग्छ भने प्रदेश संरचना शरीरको बिच भागको मेरुदण्ड जस्तै हो । तर, तपाई, हामीले नै नबुझेर यसलाई गलत व्याख्या गरिरहेको पनि पाएका छौं । प्रदेशका कामको विषयमा संघले स्वयत्त अधिकार दिएमा प्रदेशले अझै प्रभावकारी रुपमा कार्यान्वयन गरी जनतालाई बुझाउन सकिन्थ्यो भन्ने मैले महसुस गरेको छु । स्थानीय सरकार भनेको जग हो, त्यसको पिल्लर प्रदेश र ढलान वा छाँनो भनेको संघ हो भनेर मैले बुझेको छु ।

संघ र स्थानीय तहलाई संयोजन गरेर बिचको काम देखाउन प्रदेश सरकार आवश्यक छ । अहिले जति पनि विकासका काम भएका छन्, त्यसमा जनताले प्रदेश सांसदबाट अलि बढी अपेक्षा गरेको मैले महसुस गरेको छु । स्थानीय सरकारले स–साना विकासका योजना आफैंले नीति बनाएर लैजान सक्छ भने संघ नागरिकबाट अलि टाढा छ ।

जनताको पहुँच सिधै संघ सरकारसँग पुग्न नसकेको अवस्थामा प्रदेश सरकारले सहयोगीका रुपमा काम गरिरहेको छ । प्रदेश बोझ भयो भन्ने विषयमा के भन्न चाहान्छु भने हिजो पनि १४ अञ्चल, ७५ जिल्ला थिए । १४ अञ्चल भनेको अहिले ७ प्रदेश हो । तर, स्वयत्त भएर काम गर्न नसकेको र सरकारको अस्थिरताका कारण जनताले सोचेको जस्तो र हामीले पनि सन्तुष्ट हुने तरिकाले काम गर्न नसकेको महसुस भएको भने पक्कै हो ।