पोखरा । कविता गाउँ लुम्लेले स्थापना दिवस विविध कार्यक्रमका साथ मनाउने भएको छ । संस्थाका कार्यवाहक अध्यक्ष शन्तमाया गौचनको अध्यक्षतामा बसेको बैठकले उक्त निर्णय गरेको हो ।

संस्थाले २०८१ चैत १५ गते कविता प्रतियोगितासहित विविध कार्यक्रमका साथ स्थापना दिवस मनाउने भएको हो । कास्की जिल्लाको लुम्लेलाई २०६५ चैत १५ गते विविध कार्यक्रमसहित विधिवगत कविता गाउँ घोषणा भएपछि कविता गाउँ लुम्लेले स्थापना दिवस मनाउँदै आएको छ ।

बैठकले कविता पार्क लुम्ले निर्माण प्रक्रियालाई अगाडि बढाउन गठित विभिन्न उपसमितिलाई क्रियाशीलताका साथ लाग्नका लागि बैठकले आग्रह गरेको छ । पार्क निर्माण अर्थ सङ्कलन समितिका संयोजक विश्वमोहन गौचनले अर्थ संकलन प्रक्रियालाई द्रुतरुपमा अगाडि बढाइएको जानकारी गराउँदै सबैलाई आ–आफ्नो ठाउँबाट सक्दो सहयोग गर्न आग्रह गरे ।

बैठकपछि समिति, उपसमिति तथा वडा नम्बर ६ का वडाध्यक्ष एकदेव देवकोटाले पार्क निर्माणस्थलको अवलोकन गरी निर्माण प्रक्रियालाई अगाडि बढाउन वडा सक्रिय रुपमा अगाडि बढ्ने बताए ।