पोखरा । आधारभूत तहको स्कुल सञ्चालनका लागि नेपाल कम्युनिष्ट पार्टी (एमाले) कास्कीले माध्यमिक स्कुलको प्रशिक्षक प्रशिक्षण कार्यक्रम गरेको छ । केन्द्रीय पार्टी स्कुल विभागको सहकार्यमा भएको प्रशिक्षणमा जिल्ला कमिटी कास्कीका सदस्य, पालिका तथा इलाका कमिटीका अध्यक्ष, गण्डकी प्रदेश तथा कास्कीका जनसंगठनका प्रमुख गरी १ सय ४० जनाको सहभागिता छ ।

पार्टीका उपमहासचिव तथा केन्द्रीय स्कुल विभागका प्रमुख प्रदीप ज्ञवालीले पार्टीले आधारभूत, माध्यमिक र केन्द्रीय स्कुल सञ्चालन गरेको बताए । उनले पालिका, वडा, टोल, जनवर्गीय संगठन, निर्वाचित वडा सदस्य, नवप्रवेशीका लागि १८ घन्टाको आधारभूत स्कुल सञ्चालन गर्ने जनाए । उनले माध्यमिक स्कुलको प्रशिक्षकले आधारभूत स्कुलको कक्षा सञ्चालन गर्ने उल्लेख गरे ।

पार्टीले योजनाबद्ध ढंगले स्कुलिङको काम गरेको जानकारी दिँदै उनले एमालेमा आधारभूत तहको स्कुलबाट प्रशिक्षित व्यक्तिमात्रै जनप्रतिनिधि बन्न पाउने बताए । ३ दिनसम्म सञ्चालन हुने प्रशिक्षक प्रशिक्षण कार्यक्रममा एमाले उपमहासचिव ज्ञवालीले माक्र्सवादको विश्व दृष्टिकोण, दर्शन सिद्धान्त र व्यवहार, गण्डकी प्रदेश कमिटीका सचिव धनञ्जय दवाडीले संगठन निर्माण, व्यवस्थापन र परिचालन विषयमा सहजीकरण गरेका छन् ।

पार्टीका पोलिटब्युरो सदस्य टुकराज सिग्देलले पार्टी अनुशासन र कार्यशैली, केन्द्रीय स्कुल विभागका सदस्य वाइपी आचार्यले सूचना प्रविधि, गलत सूचना र प्रियतावाद, नेपालको दलहरुको तुलनात्मक अध्ययन विषयमा प्रशिक्षण दिएको अध्यक्ष अधिकारीले बताए । केन्द्रीय स्कुल विभागका सदस्य सुन्दर लामिछानेले समावेशिताको सिद्धान्त र व्यवहारिक कार्यान्वयनको अवस्था, प्राडा विश्वकल्याण पराजुलीले नेपालको संक्षिप्त इतिहास तथा नेपाली समाजको चरित्रको विषयमा सहजीकरण गरेका छन् ।

स्थायी कमिटीका सदस्य किरण गुरुङले वर्तमान परिस्थिति, नेता र कार्यकर्ताको दायित्व, स्थायी कमिटीका सदस्य खगराज अधिकारीले महाधिवेशनबाट पारित नीति, कार्यक्रम र कार्यदिशा, कास्की अध्यक्ष वैनबहादुर अधिकारीले जिल्लाको प्रशिक्षणको कार्ययोजना र डा आरसी लामिछानेले कास्कीको समग्र विकासमा पार्टीको भूमिका, विगत र वर्तमान विषयमा सहजीकरण गर्ने भएका छन् ।

कार्यक्रममा एमालेका केन्द्रीय सदस्य कृष्ण थापा, कास्की उपाध्यक्ष भेषराज बराल, सचिव दर्शन लामाले एमालेका नेता तथा कार्यकर्तालाई समयसापेक्ष प्रशिक्षण आवश्यक भएको बताए ।