पोखरा ।
नेपाल रेडक्रस सोसाइटी पोखरा १२ उपशाखाको आयोजना तथा आविष्कार अस्पताल, बुद्धचोक तथा पोखरा महानगरपालिका वार्ड नं १२ को प्राविधिक सहयोगमा निशुल्क नाक, कान, घाँटी तथा दुखाई रोगसम्बन्धी शिविर भएको छ ।

शिविरमा १ सयभन्दा बढी बिरामीको नाक, कान तथा घाँटी र दुखाइका समस्याको उपचार र औषधी सित्तैमा वितरण गरिएको थियो ।

रेडक्रस सोसाइटी पोखरा १२ सभापति इन्दिरा पन्त आचार्यको अध्यक्षतामा भएको कार्यक्रममा पोखराका १२ का वडाध्यक्ष सन्तोष बस्तोला, रेडक्रस इकाइका पूर्व सभापति कुश्मराज आचार्य, सचिव गोविन्दप्रसाद घिमिरे लगायतले बोलेका थिए ।

कार्यक्रममा वरिष्ठ नाक, कान तथा घाँटीरोग विशेषज्ञ डा. सञ्जय कोइरालाले लामो समय कान पाकिरहने रोगले सुनाई क्षमता बिगार्नुका साथै संक्रमण फैलिने औंल्याए । उनले भने, ‘यस्तो हुँदा संक्रमण दिमागसम्म फैलिएर ज्यान नै खतरामा पर्न सक्ने हुँदा बेलैमा उपचार गर्नु जरुरी छ ।’

कार्यक्रममा वरिष्ठ दुखाइ रोग विशेषज्ञ डा कृष्ण बोगटीले शरीरमा हुने दीर्घकालीन दुखाईका विषयमा सचेतना दिएका थिए ।