पाेखरा ।

नेपाल समाजवादी पार्टी (नयाँ शक्ति) को नेतृत्व चयनका लागि मंगलबार मतदान हुँदैछ । काठमाडौंमा आइतबारदेखि जारी महाधिवेशनमा आज दिउँसो ३ बजेदेखि मतदान सुरु हुनेछ।

पार्टीको अध्यक्षमा डा बाबुराम भट्टराई र नेत्रप्रसाद चापागाईं प्रतिस्पर्धामा छन्।

उपाध्यक्षतर्फ खस आर्य समूहबाट जनकराज शाह र ईश्वर रिजालले उम्मेदवारी दिएका छन्। महिला उपाध्यक्षमा मानुषी यमि भट्टराईले मात्र उम्मेदवार दिएकी छन्।

आदिवासी जनजाति उपाध्यक्षका लागि रामबहादुर घले, टेकबहादुर बाठामगर, अनुप सिं सुवाल, र दलबहादुर लिम्बू प्रतिस्पर्धामा छन्। दलित उपाध्यक्षमा दुर्गा सोब एकल उम्मेदवार बनेका छन्।

मधेशी–थारु उपाध्यक्षका लागि उमेश शाह र चिनक कुर्मी चुनावी प्रतिस्पर्धामा छन्। महासचिव पदका लागि घमान सिंह गुरुङ, सोनाम सिं स्याङ्तान, र राजु नेपालबीच प्रतिस्पर्धा हुनेछ।

नेसपाको केन्द्रीय संरचना ९९ सदस्यीय रहनेछ, जसमा ११ पदाधिकारी र ९० जना प्रत्यक्ष निर्वाचित हुनेछन्। बाँकी ९ जना भने मनोनीत गरिने व्यवस्था छ।