पोखरा ।
चर्च ब्वाइज यूनाइटेड क्लबलाई हराउँदै नेपाल पुलिस क्लब पोखरामा जारी २४ औं आहारारा पोखरा गोल्डकपको फाइनल प्रवेश गरेको छ ।
सहारा क्लब पोखराको आयोजनामा जारी प्रतियोगिता अन्तर्गत बुधबार भएको पहिलो सेमिफाइनल खेलमा पुलिसले चर्च ब्वाइजलाई १–० गोलअन्तरले पराजित गर्दै उपाधि नजिक पुगेको हो । योसँगै नेपाल पुलिस कीर्तिमानी ११ औं पटक आहारारा गोल्डकप फुटबल प्रतियोगिताको फाइनलमा पुगेको पुगेको छ ।
खेलको ५८ औं मिनेटमा सन्जिव लामाले गरेको गोल पुलिसका लागि फाइनल पुग्न पर्याप्त रह्यो । उनले पेनाल्टी बक्सको बाहिरबाट गरेका प्रहार चर्च ब्वाइजका गोलकिपर टिकेन्द्रसिंह थापाले रोक्ने कुनै मौका नै पाएनन् ।
पुलिसले बिहीबार हुने दोस्रो सेमिफाइनल अन्तर्गत थ्रीस्टार क्लब र उज्वेकिस्तानको ब्ल्याक बुल्स एफसीबिचको विजेतसँग उपाधिका लागि शनिवार खेल्नेछ ।
फागुन ३ गतेसम्म सञ्चालन हुने प्रतियोगिताको विजेताले १२ लाख १ हजार र दोस्रो हुने टोलीले ६ लाख १ रुपैयाँ प्राप्त गर्नेछ ।