पोखरा ।
पोखरा महानगरको फोहोर बिहीबारबाट उठाइएकाे छ । करिब एक सातादेखि महानगरको फोहोर नउठ्दा मुख्य सडक र बस्तीका खाली ठाउँमा फोहोर थुप्रिएको थियो । महानगरले फोहोर व्यवस्थापन गर्दै आएको वडा नम्बर ३२ लामेआहाल क्षेत्रका बासिन्दासँग सहमतिपछि फोहोर उठेकाे हो ।

लामेआहालमा अस्थायी रुपमा फोहोरमैला व्यवस्थापन हुँदै आएको सम्झौता अवधि सकिएपछि स्थानीयले फोहोर व्यवस्थापन गर्न रोकेका थिए । बुधबार मेयर धनराज आचार्यको उपस्थितिमा भएको स्थानीय सरोकारवालसँगको छलफलपछि फोहोर व्यवस्थापन गर्न दिन स्थानीय राजी भएका हुन् ।

महानगरका प्रवक्ता मोतीलाल तिम्सिनाले छलफलले स्थानीयका माग सम्बोधन गर्ने र बिहीबारबाट फोहोर व्यवस्थापन पूर्ववत् गर्ने निर्णय गरेको जानकारी दिए । ‘पोखरा महानगरपालिका वडा नं ३२ को सामाजिक, पूर्वाधार विकास, वातावरण र विपद व्यवस्थापनको क्षेत्रत्रमा देखिएका सवाल तथा समस्यालाई महानगरपालिकाको तर्फबाट आगामी कार्यपालिका/नगरसभामा छलफल गरी सम्बोधन गरिने प्रतिबद्धतापछि फोहोर व्यवस्थापनमा सहमति जुटेको छ,’ प्रवक्ता तिम्सिनाले भने ।

फोहोरमैला प्रभावित क्षेत्रमा सरसफाइ, विकास निर्माणबारे गर्नुपर्ने काममा प्रतिवद्धता जनाएर पनि काम नभएको भन्दै फोहोर व्यवस्थापनमा समस्या हुने गरेको छ । पोखरा महानगरमा अहिले ६ वडा कम्पनीले फोहोर व्यवस्थापन गर्दै आएका छन् । पोखरामा दैनिक एक सय टन जति फोहोर संकलन हुन्छ । महानगरले २०२३ जनवरीबाट पोखरा अन्तर्राष्ट्रिय विमानस्थल सञ्चालनमा आएपछि लामेआहालस्थित सेती नदी किनारमा फोहोर व्यवस्थापन गर्दै आएको छ ।

फोहोर व्यवस्थापन उचित तवरले नहुँदा दुर्गन्ध फैलिएको, सडक कच्ची हुँदा हिलो र धुलोले सास्ती दिएको भन्दै स्थानीयले बेला बेलामा फोहोर फाल्न अवरोध गर्दै आएका छन् । पोखरा १४, बाच्छेबुडुवाको ल्याडफिल साइट अन्तर्राष्ट्रिय विमानस्थल सञ्चालनका लागि बन्द गर्नुपरेपछि महानगरले वैकल्पिक व्यवस्था खोजेको थियो ।

पोखरा महानगरले वडा नम्बर ३३ को पुँडिटार क्षेत्रमा रहेको झाक्रीखोला र देव्रेखोला क्षेत्रमा ल्याडफिल साइट बनाउन निर्णय गरिसकेको छ । ल्याडफिल साइट नभएर फोहोर प्रशोधन केन्द्र बनाउने योजना भए पनि त्यो अघि बढ्न सकेको छैन ।