पोखरा । हेमराज पहारी स्मृति पुरस्कार २०८१ कास्कीको माछापुच्छ्रे गाउँपालिका वडा नं ३ घाचोकस्थित सिर्जना साहित्य सदनलाई प्रदान गरिने भएको छ । हेमराज पहारी स्मृति प्रतिष्ठान पोखराको सोमबार बसेको बैठकले सिर्जना साहित्य सदनलाई पुरस्कार अर्पण गर्ने निर्णय गरेको हो । पुरस्कारको राशि १ लाख रुपैयाँ नगद र ताम्रपत्र छ ।

प्रतिष्ठान सल्लाहकार कृष्णप्रसाद बास्तोला संयोजक, हरिदेवी कोइराला, दुर्गाबहादुर शाह ‘बाबा’ सदस्य तथा प्रतिष्ठानकी अध्यक्ष रीता न्यौपाने पहारी र सचिव महेन्द्र अधिकारी पदेन सदस्य रहेको प्रतिभा छनोट समितिको सिफारिसलाई प्रतिष्ठानको कार्यसमिति बैठकले अनुमोदन गर्दै सिर्जना साहित्य सदनलाई पुरस्कार अर्पण गर्ने निर्णय गरेको हो ।

२०६७ सालमा स्थापित प्रतिष्ठानले सिर्जनालाई प्रदान गर्न लागेको यो पुरस्कार आठौँ पटक हो । प्रतिष्ठानले यसअघि संस्कृतिविद् सत्यमोहन जोशी, राप्ती साहित्य परिषद् दाङ, विमल गुरुङ स्मृति पुस्तकालय धरान, लोककवि अली मियाँ (मरणोपरान्त), झरना साहित्य परिवार मकवानपुर, साहित्य सन्ध्या काठमाडौँ र साहित्यकार सरुभक्तलाई पुरस्कार प्रदान गरिसकेको छ । यही फागुन १६ गते सिर्जना साहित्य सदनको लाहाचोकस्थित भवनमै एक कार्यक्रम आयोजना गरी पुरस्कार अर्पण गरिने संस्थाकी अध्यक्ष रीता न्यौपाने पहारीले जानकारी दिइन् ।

साहित्यकार हेमराज पहारीको २०६६ फागुन १७ गते सडक दुर्घटनामा निधन भएको थियो । पहारीकै स्मृतिमा स्थापित प्रतिष्ठानले हरेक २ वर्षमा पुरस्कार अर्पण गर्दै आएको छ । हेमराजकाको गीत सञ्चयन ‘हेमराज पहारीका गीतहरू’, नियात्रा सञ्चयन ‘उत्तरी गोलाद्र्धको एक फन्को’ र कविता सञ्चयन ‘देशको अभिभारा’ प्रकाशित छन् ।

प्रतिष्ठानले पहारीका बाँकी सिर्जना प्रकाशन, उनका योगदान र सिर्जनाको प्रवद्र्धन एवं नेपाली साहित्यको उत्थानका लागि काम गर्दै आएको छ । कास्कीको सिर्जना साहित्य सदन २०५४ देखि निरन्तर क्रियाशील छ । नेपाली भाषा, साहित्य, कला र संस्कृतिको उत्थानसहित विभिन्न साहित्यिक गतिविधि गर्दै आएको सदनले हरेक वर्ष मुखपत्र ‘सिर्जना’ प्रकाशन गर्छ ।