पोखरा । फेवातालमा डुंगामा सवार गर्ने यात्रुुको सुरक्षाका लागि जिल्ला प्रहरी कार्यालय कास्कीले सोमबार डुंगा चालकले मादक पदार्थ सेवन (मापसे) र लागुपदार्थ सेवन (लापसे) परीक्षण गरेको छ ।

डुंगा चालकले ती दुबै पदार्थको सेवन गरेर डुंगा चलाउदा हुन सक्ने सम्भावित घटनालाई रोक्न कार्यक्रम गरेको प्रहरी उपरीक्षक श्यामबाबु ओलियाले जानकारी दिए ।

वडा प्रहरी कार्यालय बैदाम, सामुदायिक सेवा तथा सामुदायिक प्रहरी सेवा जिल्ला समन्वय समिति कास्की र सामुदायिक सेवा केन्द्र बैदामसँगको समन्वयमा लेकसाइडको बाराहीघाट र फिस्टेल गेटमा डुंगा चालकसँग अन्तक्र्रियाका अलवा मापसे परीक्षण गरिएको थियो । प्रहरी उपरीक्षक ओलियाले २४ जना डुंगा चालकको परीक्षण गर्दा १ जनाले मापसे गरेको पाइएको बताए ।

‘पोखरा आउने पर्यटकमध्ये प्रायजसोले फेवातालमा डुंगामा सयर गर्छन् । पर्यटकको सुरक्षाको लागि सांकेतिक रुपमा कार्यक्रम गरेको हो,’ उनले भने, ‘चालकले मादक पदार्थ सेवन गरेर डुंगा चलाएको सन्दर्भमा बेला बखत यात्रुबाट प्रहरीलाई उजुरी आउने गरेको छ । प्रहरीले गरेको पहलले सकारात्मक सन्देश जाने छ ।’ उनले प्रहरीले यात्रुको सुरक्षालाई ख्याल राख्दै नियमित अनुगमन गर्ने जानकारी दिए । उनले मादक पदार्थ सेवन गरेर डुंगा नचलाउन तथा यात्रुलाई राम्रो व्यवहार गर्न सुझाव दिए ।

सामुदायिक सेवा केन्द्र जिल्ला समन्वय समिति कास्की प्रमुख भीम पराजुलीले फागुन महिना हावा हुरी चल्न सक्ने र डुंगा चालकबाट हुन सक्ने सानो गल्तीले दुर्घटना हुन सक्ने बताए । उनले अन्तर्राष्ट्रिय क्षेत्रका नकारात्मक सन्देश जाने नदिन चालकको महत्वपूर्ण भूमिका रहने उल्लेख गरे । फेवातालमा डुंगा दुर्घटना हुन नदिन सचेतना अभियान गर्ने जनाए ।

फेवा डुंगा व्यवसायी समितिका अध्यक्ष बलराम गिरीले चालकलाई मदिरा सेवन गरेर डुंगा चलाउन नदिन समितिले नियमित अनुगमन गरेको बताए । चालकले यात्रुसँग गर्ने बोली वचनको समेत निगरानी राख्ने उल्लेख गर्दै उनले मदिरा सेवन गरेको पाइएमा ३ महिना डुंगा चलाउन रोक लगाउने जनाए । उनले समितिले चालकलाई छुट्टै लाइफ ज्याकेटको व्यवस्थाका अलवा यात्रुको बिमाका व्यवस्था गर्ने योजना सुनाए ।

कार्यक्रममा डुंगा चालकले परिचयपत्र लगाएको र लाइफ ज्याकेटको अनिवार्य प्रयोगको बारेमा समेत निरीक्षण गरिएको थियो । फेवाताल भरीमा ७ सय ७६ डुंगा छन् । बाराही घाटमा समेत ३ सय ५६ डुंगा छन् । उनले २ सय ५० देखि ३ सय डुंगा चालक रहेको बताए ।