पोखरा । पोखरा महानगरपालिका २५ नं. वडा कार्यालयले बालबालिका लक्षित कार्यक्रम अन्तर्गत बाल नृत्य प्रतियोगिता आयोजना गर्ने भएको छ । विद्यालयका विद्यार्थीको प्रतिभा प्रस्फुटन गर्ने उद्देश्यका साथ आयोजना गर्न लागिएको उक्त लोक नृत्य प्रतियोगिता कार्यक्रममा फागुन ९ गते हुने पोखरा महानगर पालिका वडा नं. २५ का वडा अध्यक्ष तथा महानगर प्रवक्ता मोतिलाल तिम्सिनाले जानकारी दिए ।

प्रतियोगितामा हेमजामा रहेका सामुदायिक तथा संस्थागत विद्यालयका विद्यार्थीले सहभागिता जनाउने व्यवस्था छ । प्रतियोगितामा मावितर्फ ३ जनामा १ जना छात्रा अनिवार्य र आधारभूत विद्यालयतर्फ एक जना छात्र÷छात्रा सहभागी जनाउन पाउने अध्यक्ष तिम्सिनाले जानकारी दिए ।

प्रतियोगितामा प्रथम हुनलाई १० हजार, द्वितीय हुने ७ हजार तथा तृतीय हुने ५ हजार र ट्रफी प्रदान गरिने उनले जानकारी दिए । ‘हरेक बालबालिकासँग कुनै न कुनै प्रतिभा लुकेर बसेको हुन्छ, तिनै प्रतिभा उजागर गर्न वडा कार्यलयले यो कार्यक्रमको आयोजना गरेको हो’, अध्यक्ष तिम्सिनाले भने, ‘विद्यार्थीलाई हौसला प्रदान गर्न र ती प्रतिभा उजागर गर्न कार्यक्रमलाई भव्य बनाउनका लागि हेमजावासीको सहभागिताका लागि अनुरोध गर्दछु ।’

हेमजा सामुदायिक संस्थागत तथा वौद्ध गुम्बाले सञ्चालन गरेका विद्यालयसहित १४ विद्यालय रहेको वडा सचिव चोलाकान्त पौडेलले जानकारी दिए ।