पोखरा ।
पोखरा ३ नदीपुरमा रहेको माउन्ट अन्नपूर्ण माविमा कक्षा ११ र १२ मा रहेका विद्यार्थी सम्मिलित सोसल सर्भिस क्लबले शैक्षिक तथा खेलकुद सामग्री वितरण गरेको छ । बुधबार कास्कीको मादी गाउँपालिका ५ ठुलास्वाँरामा रहेको विद्याज्योति आधारभूत विद्यालयका २९ विद्यार्थीका लागि स्कुलमा नै पुगेर शैक्षिक सामग्री वितरण गरिएको हो ।

ती शैक्षिक सामग्री बिद्यार्थी तथा शिक्षकको आर्थिक सहयोगमार्फत खरिद गरी बितरण गरिएको क्लबका सचिव दृष्य गुरुङले जानकारी दिइन् । मादी गाउँपालिका वडा नम्बर ५ का वडा अध्यक्ष होमनाथ अधिकारीले सोसल सर्भिस क्लबले गरेको सहयोगले विद्यालयका बिद्यार्थीलाई शैक्षिक क्षेत्रमा सहयोग पुग्ने बताए ।

विद्यालय व्यवस्थापन समिति अध्यक्ष भीम गुरुङले विद्यालयको आर्थिक स्रोत निकै कमजोर भएको अवस्थामा क्लबले गरेको सहयोगले पठनपाठनमा सहयोग हुने बताए । विद्यालयका प्रधानाध्यापक महेन्द्र पौडेलले यस्तो कदमले सिकाइमा सहयोग गर्ने जनाए ।

माउन्ट अन्नपूर्ण माविका प्रशासक चित्र गुरुङले विद्यालयमा गठन गरिएको क्लबले समाजसेवा गर्ने गरेकोमा खुसी व्यक्त गरे । उनले विद्यार्थीलाई किताबी ज्ञानमा मात्रै ुस्मित नगरी अन्य समाजसेवाका गतिबिधिमा समेत लाग्न आग्रह गरे ।

क्लबका अध्यक्ष प्रथम श्रेष्ठले शिक्षकहरुको प्रेरणाबाट क्लब गठन भएको बताउँदै क्लबले समाज र शिक्षाको क्षेत्रमा काम गदै जाने योजना बनाएको सुनाए । कार्यक्रममा माउन्ट अन्नपूर्ण माविका लेखा प्रमुख नवराज पौडेल, विद्यालयका सहायक प्रधानाध्यापक कृष्णकुमारी अधिकारी, क्लबउपाध्यक्ष मिलन श्रेष्ठ लगायतले बोलेका थिए ।