पोखरा ।

चितवनको इच्छाकामना गाउँपालिका ५ स्थित ३ नम्बर पुलबाट गत २ गते मोटरसाइकल दुर्घटना भएर त्रिशूलीमा खसेका युवक मृत भेटिएका छन्। लमजुङका २७ वर्षीय रोहित राना आइतबार बिहान ९ दिनपछि मृत फेला परेका हुन्।

शव मोटरसाइकल दुर्घटना भएर उनी खसेको स्थानभन्दा एक सय मिटर तल भेटिएको प्रहरीले जानकारी दिएकाे छ ।

शव भेटिएपछि पोस्टमर्टमका लागि भरतपुर अस्पताल लगिएको छ। रोहितका परिवारले शव सनाखत गरिसकेका छन्।

चितवनको भरतपुर महानगरपालिका १ रामनगरमा बस्दै आएका उनी भारतीय सेनामा कार्यरत रहेको पनि पुष्टि भएको प्रहरीले बताएकाे छ ।

उनी सवार बा ०६–०२ प ९२०४ नम्बरको मोटरसाइकल नारायणघाटबाट मुग्लिनतर्फ जाँदै गर्दा दुर्घटना भएको थियो। मोटरसाइकल सडकमै अडिएको थियो भने उनी त्रिशूलीमा खसेका थिए।