पोखरा ।
लोककवि अली मियाँको १०७ औँ जन्मजयन्तीको अवसरमा राधाकृष्ण सांस्कृतिक समूहलाई पुरस्कृत गरिएको छ । कास्कीको लामेआहालमा रहेको सांस्कृतिक समूहले लोक भजन संरक्षण तथा विकासमा पुर्‍याएको योगदान स्वरुप अली मियाँ लोकवाङ्मय प्रतिष्ठान अली मियाँ प्रोत्साहन पुरस्कार प्रदान गरेको हो ।

समूहलाई नगद २० हजार, सम्मानपत्र र दोसल्लासहित प्रतिष्ठानका अध्यक्ष हनिफ मियाँले सम्मान गरे । धार्मिक सद्भाव कायम गर्नुपर्छ भन्ने मान्यता राख्ने कवि मियाँको जन्मोेत्सव मनाउने क्रममा बिहीबार पोखरा स्थित भानु पार्कमा वृक्षरोपण गरिएको थियो । अध्यक्ष मियाँले लोककविको योगदानलाई अमर बनाउँदै लोकसर्जकहरुलाई प्रोत्साहन गर्न प्रतिष्ठान लागिपरेको उल्लेख गरे ।

कार्यक्रममा प्राडा कुसुमाकर न्यौपाने, प्राज्ञ हरिदेवी कोइराला, पोखरा प्रज्ञा प्रतिष्ठानका संस्थापक कुलपति पद्मराज ढकाल, स्वतन्त्र पत्रकार संघ नेपालका अध्यक्ष कृष्णप्रसाद बास्तोला, पाल्पा साहित्य समाजका अध्यक्ष पुष्कर रेग्मी लगायतले बोलेका थिए ।

सम्मानित बनेपछि राधाकृष्ण सांस्कृतिक समूहका अध्यक्ष सञ्जयराज ढकालले लोककवि अलि मियाँका नामबाट प्राप्त सम्मानले समूहलाई थप जिम्मेवार र उत्साहित बनाएको उल्लेख गरे ।