पोखरा ।
निजी तथा संस्थागत विद्यालयमा कार्यरत शिक्षक/कर्मचारीले विद्यालयलाई अनिवार्य रुपमा योगदानमा आधारित सामाजिक सुरक्षा कोषमा आवद्ध गराउन माग गरेका छन् । निजी तथा संस्थागत विद्यालय शिक्षक/कर्मचारी युनियन (प्याब्सु) केन्द्रीय समितिले शनिबार पोखरामा पत्रकार सम्मेलनमा गरी आगामी शैक्षिक सत्रदेखि सामाजिक सुरक्षा कोष लागू गर्न माग गरेको हो ।
प्याब्सुले सुरक्षा कोषसहित विभिन्न ९ बुँदे माग राखेका छन् । उनीहरुले माग पूरा नभए आन्दोलन गर्ने चेतावनीसमेत दिए । समितिका अध्यक्ष शिवलाल उपाध्यायले देशभर रहेका निजी विद्यालयमध्ये १० प्रतिशत विद्यालयमात्र सामाजिक सुरक्षाकोषमा आवद्ध भएको बताए ।

कास्कीमा ५ वटामात्र निजी विद्यालय सामाजिक सुरक्षा कोषमा आवद्ध भएको उनले जानकारी दिए । उपाध्यायका अनुसार प्रत्येक शिक्षक र कर्मचारीलाई तलब नै उल्लेख गरी नियुक्ति पत्र दिनुपर्ने, नेपाल सरकारले तोकेको बिदा उपलब्ध गराउनुपर्ने, शिक्षक, कर्मचारीको तलब, भत्ता, ग्रेड सबै सरकारीसरह गर्न माग गरिएको छ ।

विद्यालयमा कार्यरत शिक्षक र कर्मचारीका २सन्तानलाई छात्रवृत्ति व्यवस्था, शिक्षक, कर्मचारीलाई बोलिने भाषा मर्यादित हुनुपर्ने, विना कारण शिक्षक, कर्मचारीलाई हटाउन नपाइने, शिक्षक र कर्मचारीलाई विद्यालयले हटाउन चाहेमा ६ महिनासम्मको सेवा, सुविधा दिनुपर्ने, सामुदायिक विद्यालयका निजी स्रोतका शिक्षकलाईसमेत सामाजिक सुरक्षा कोषमा आवद्ध गराउनुपर्ने पनि उनीहरुका माग छन् । यसअघि पनि मागबारे सम्बन्धित पक्षको ध्यानाकर्षण गराउँदा कुनै सुनवाइ नभएको उपाध्यायको भनाइ छ ।