पोखरा । पोखरा महानगरपालिका दोस्रो अन्तर क्लब पुरुष टि–२० क्रिकेट प्रतियोगिता २०८१ मा कास्की क्रिकेट क्लबले विजयी सुरुवात गरेको छ । पोखरा महानगरपालिका शिक्षा महाशाखाको आयोजना तथा पोखरा महानगरपालिका क्रिकेट संघको संयोजन तथा व्यवस्थापनमा मंगलबारदेखि लेखानाथस्थित इडेन हेभेन क्रिकेट मैदानमा सुरु भएको हो ।

प्रतियोगिताको उद्घाटन खेलमा अरण्यज्योति क्रिकेट क्लबलाई ७४ रनले पराजित गर्दै कास्की क्रिकेट क्लबले विजयी सुरुवात गरेको हो । टस जितेर पहिले ब्याटिङमा उत्रिएको कास्की क्रिकेट क्लबले निर्धारित २० ओभरको खेलमा ५ विकेट गुमाएर २ सय रन बनाएको थियो । उसका लागि आदित्य थापाले विष्फोटक पारी खेल्दै ५७ बलमा १ सय ७ रनको योगदान दिए । उनलाई सफल श्रेष्ठले ३६ बलमा ४२ रन जोड्दै साथ दिएका थिए ।

२ सय १ रनको विशाल लक्ष्य पछ्याएको अरण्यज्योति क्रिकेट क्लबले पूरै ओभर खेलेर अल आउट हुँदै केवल १ सय २६ रनमात्र बनाउन सक्यो । उसका लागि विधान श्रेष्ठले विष्फोटक पारी खेल्दै २० बलमा ३२ रन बनाउनुबाहेक अन्यले सम्झन लायक पारी खेल्न सकेनन् ।

उद्घाटन खेलमा विष्फोटक पारी खेलेका कास्की क्रिकेट संघका आदित्य थापा प्लेयर अफ दी म्याच घोषित भए । यसअघि प्रतियोगिताको कास्की क्रिकेट संघका अध्यक्ष वीरेन्द्र पुनले उद्घाटन गरेका थिए । उनले अम्पायर प्रदीप तामाङलाई क्रिकेट बल दिएर उद्घाटन गरेका हुन् ।

फागुन २५ गतेसम्म सञ्चालन हुने प्रतियोगिताको विजेता तथा उपविजेता टिमलाई ट्रफी मेडल र प्रमाणपत्र प्रदान गरिने जनाइएको छ । हरेक खेलमा म्यान अफ द म्याच, म्यान अफ द सिरिज, बेस्ट ब्याटर, वेष्ट बलर लगायतलाई पुरस्कार प्रदान गरिने पोखरा महानगरपालिका क्रिकेट संघका अध्यक्ष वीरेन्द्र पुनले जानकारी दिए ।