पोखरा ।
पर्यटन राजधानी पोखरामा विदेशी पर्यटकको आगमन बढाउने लक्ष्यसहित हिमालय एयरलाइन्सले पोखरा ल्हासा उडान गर्ने भएको छ । एयरलाइन्सले आगामी चैत १८ देखि पोखराबाट ल्हासा उडान सुरु गर्ने जनाएको हो ।

उडान हुने घोषणासँगै यहाँका पर्यटन व्यवसायीले पोखराको पर्यटन प्रवर्द्धनमा थप टेवा पुग्ने विश्वास व्यक्त गरेका छन् । पोखरालाई अन्तरराष्ट्रिय स्तरमा थप परिचित गराउने उद्देश्यसहित सुरु गरिने यो उडानले चिनियाँ पर्यटकलाई नेपाल भित्र्याउन महत्वपूर्ण सहयोग पुग्ने अपेक्षा गरिएको छ ।

अन्तरराष्ट्रिय विमानस्थल सञ्चालनमा आएको २ वर्ष बितिसक्दा पनि व्यावसायिक उडानले निरन्तरता पाउन सकेको छैन । यस्तो अवस्थामा हिमालय एयरलाइन्सले पोखरा–ल्हासा उडान सञ्चालन गर्दा चिनियाँ पर्यटक भित्रिने आशा जागेको व्यवसायीको प्रतिक्रिया छ ।

‘पोखरा अन्तरराष्ट्रिय विमानस्थल सञ्चालन हुँदा व्यवसायीमा ठूलो आशा थियो, तर अपेक्षाकृत अन्तरराष्ट्रिय उडान नहुँदा त्यो उत्साह केही अधुरो भएको थियो, अब भने पोखराबाट चीनको ल्हासासम्म उडान सञ्चालन हुने खबरले पर्यटन क्षेत्रमा नयाँ आशा जागेको छ’, होटेल संघका केन्द्रीय सदस्य भरतराज पराजुलीले भने, ‘यसले विशेषगरी चिनियाँ पर्यटकको आगमन बढाउने मात्र होइन, पोखरालाई अन्तरराष्ट्रिय पर्यटन केन्द्रका रूपमा स्थापित गर्न महत्वपूर्ण भूमिका खेल्नेछ ।’

रेस्टुरेन्ट एन्ड बार एसोसिएसन (रेवान) पोखरा अध्यक्ष विश्वराज पौडेल पोखरा भ्रमण वर्ष २०२५ घोषणासँगै हुन लागेको यो उडानले पोखरामा चिनियाँ पर्यटक भित्र्याउन बाटो खुल्ने बताउँछन् । ‘यो उडानले चिनियाँ पर्यटकको आगमन बढाएर स्थानीय पर्यटन व्यवसायलाई मजबुत बनाउनेमात्र होइन, पोखरालाई दक्षिण एसियाकै प्रमुख पर्यटन केन्द्रका रूपमा स्थापित गर्न मद्दत गर्ने छ’, पौडेलले भने ।

नेपाल पर्यटन बोर्ड गण्डकी प्रमुख मणिराज लामिछानेले पोखरा–ल्हासा उडान पोखराको पर्यटन प्रवर्धनका लागि ठूलो उपलब्धि हुने जनाए । भने, ‘यसले नेपाल–चीनबीचको पर्यटन सम्बन्धलाई मजबुत बनाउने र चिनियाँ पर्यटकलाई सहज यात्रा अनुभव प्रदान गर्ने छ ।’

नेपालमा चिनियाँ पर्यटकहरूको संख्या कोभिड–१९ अघि उच्च विन्दुमा थियो । २०१९ मा १ लाख ६९ हजार ५ सय ४३ चिनियाँ पर्यटक नेपाल आएका थिए । कोभिड महामारीपछि उक्त संख्या घटे पनि पछिल्लो समय सुधार हुँदै गएको छ । २०२३ मा करिब १ लाख चिनियाँ पर्यटक नेपाल आएका थिए ।

पोखरा ल्हासाको पहिलो उडानमा पोखराबाट पोखरा महानगरपालिकाको अगुवाइमा पर्यटन व्यवसायीसहित विभिन्न क्षेत्रका १ सय २७ जनाले उडान भर्ने छन् भने चीनबाट करिब १ हजार पर्यटक पोखरा आउने तयारीमा रहेको जनाइएको छ ।

हिमालय एयरलाइन्सका प्रवक्ता विजय श्रेष्ठले सुरुआती चरणमा हप्तामा एक पटक उडान जनाए । उनले भने, ‘मागअनुसार उडान क्रमशः वृद्धि गरिनेछ ।’ हिमालय एयरलाइन्सको मुख्य उद्देश्य चीनका विभिन्न १० पर्यटकीय क्षेत्रमा उडान भर्ने र नेपालमा वार्षिक १० लाख चिनिँया पर्यटक भित्र्याउने रहेको श्रेष्ठको भनाइ छ ।