पोखरा । मकवानपुरको हेटौंडामा एक अन्तक्र्रिया कार्यक्रमको आयोजना गरी यस वर्षको जाऊँ है पोखरा अभियान सम्पन्न गरिएको छ । बागमती प्रदेशका भौतिक पूर्वाधार विकास मन्त्री अमनकुमार मास्केले बिहीबार अभियानको समापन गर्दै जाउँ है पोखरा अभियान पर्यटन क्षेत्रका लागि अनुकरणीय अभियान भएको भनाइ राखे । आफ्नो खुट्टामा आफैं उभिन सक्ने वातावरण जाउँ है पोखरा जस्ता अभियानले सिर्जना गर्न सक्ने उनले बताए ।

कार्यक्रममा बोल्दै अभियानका संयोजक एवं आयोजक होटल संघ पोखरा नेपालका अध्यक्ष लक्ष्मण सुवेदीले नयाँ वर्षको अवसरमा फेवा किनारमा आयोजना हुने नयाँ वर्ष महोत्सवका क्रममा पोखरा पुग्ने पाहुनालाई संघअन्तर्गतका होटल तथा लजमा २० प्रतिशत छुट प्रदान गरिने बताए । उनले जाउँ है पोखरा अभियानले देशका सातै प्रदेश जोड्ने उद्देश्य बोकेको बताउँदै विदेशी र गोरो छाला मात्र नभई नेपाली पनि पर्यटक हुन सक्छन् भन्ने मान्यता अभियानले सिर्जना गरेको स्मरण गराए ।

कार्यक्रममा बन्दीपुर केवलकार प्रालिका उपाध्यक्ष किरण पोखरेलले उक्त परियोजना अन्तर्गत सञ्चालन भएका योजना र आगामी दिनमा सञ्चालन हुने सेवा–सुविधाबारे जानकारी गराएका थिए । कार्यक्रममा होटल संघ मकवानपुरका अध्यक्ष शंकरलाल श्रेष्ठ, पर्यटन क्षेत्रका विज्ञ दिपेन्द्र पहारी र आयोजक संघका उपाध्यक्ष गणेशराज पहारीले भनाइ राखेका थिए ।

यसअघि बुधबार महोत्तरीको बर्दिवासमा आयोजित कार्यक्रममा सो क्षेत्रका पर्यटकीय गन्तव्य र सम्भावनाका बारेमा चर्चा गरिएको थियो । सो अवसरमा बोल्दै मधेस प्रदेशका उद्योग, वाणिज्य एवं पर्यटन मन्त्री सकिल अलि मियाँले पर्यटन व्यवसायी र सम्बन्धित संघसंस्थाहरूसँग अन्तक्र्रिया गरी सल्लाह र सुझाव लिएर आउँदो बजेट तर्जुमा गरिने प्रतिबद्धता जनाए ।

कार्यक्रममा सांसद शारदा देवी थापा, आयोजक संघका अध्यक्ष लक्ष्मण सुवेदी, पर्यटन विज्ञ दिपेन्द्र पहारी, नाथमका सिवेन्द्र मलिक, होटलकर्मीहरू गुञ्ज कार्की र हिरा गौतम तथा आयोजक संघका उपाध्यक्ष गणेशराज पहारीले भनाइ राखेका थिए । कार्यक्रमको सञ्चालन संघकी सचिव पार्वती पाण्डेले गरेकी थिइन् ।

आन्तरिक पर्यटन प्रवद्र्धन गर्ने उद्देश्यले संघले दुई दशकअघि सुरु गरेको जाउँ है पोखरा अभियान यस पटक १८ फागुनमा सुरु भई २२ फागुनमा सम्पन्न भएको हो । पहिलो कार्यक्रम धनुषाको जनकपुरमा, दोस्रो तथा तेस्रो कार्यक्रम क्रमशः झापाको विर्तामोड र सुनसरीको इटहरीमा सम्पन्न भएका थिए । नेपाल पर्यटन बोर्डको प्रवद्र्धनमा सम्पन्न पूर्वको अभियानको क्रममा संघका अध्यक्ष लक्ष्मण सुवेदीले नयाँ वर्षको अवसरमा पोखरामा आयोजना गरिएको नयाँ वर्ष महोत्सवमा सहभागी हुन पूर्वका बासिन्दालाई निम्तो प्रदान गरेका थिए । पर्यटकीय राजधानी पोखरामा पोखरा महानगरपालिकाले घोषणा गरेको ‘भिजिट पोखरा इयर २०२५’ का बारेमा समेत अभियानको क्रममा चर्चा गरिएको थियो ।