जोमसोम । अन्तर्राष्ट्रिय नारी दिवसका अवसरमा मुस्ताङमा ज्येष्ठ महिलालाई सम्मान गरिएको छ । मुस्ताङको घरपझोङ गाउँपालिकाको आयोजना भएको दिवस कार्यक्रममा गाउँपालिका र पाइला नेपालले २ महिलाहरुलाई अगल÷अलग रुपमा सम्मान गरेको हो ।

घरपझोङ —३ स्याउ गाउँकी ८६ वर्षीया नर्साङ्मो थकालीलाई गाउँपालिकाले दोसल्ला ओढाएर प्रमाणपत्रले सम्मान गरेको हो । यसैगरी पाइला नेपाल मुस्ताङ शाखाले घरपझोङ—१ चिमाङ बस्ने ९० वर्षीया कान्छी थकालीलाई नगदसहित दोसल्ला ओढाएर प्रमाणपत्रले सम्मान गरेको हो । उनीहरुलाई मुस्ताङका प्रमुख जिल्ला अधिकारी विष्णुप्रसाद भुसाल र घरपझोङ गाउँपालिकी उपाध्यक्ष जमुना रानामगरले दोसल्ला ओढाएर प्रमाणपत्रले सम्मान गरे ।

स्याउ गाउँको मुख्य आयोजना भएको ११५ औं अन्तर्राष्ट्रिय नारी दिवसलाई घरपझोङ गाउँपालिका, सामाजिक विकास कार्यालय मुस्ताङ, स्वास्थ्य कार्यालय, एक्याप र सुरक्षा निकाय लगायतले समन्वय र सहकार्य गरेका थिए । दिवसमा महिलाहरुको लागि हाजिरी जवाफ प्रतियोगिता आयोजना गरिएको थियो । हाजिरी जवाफमा पुथाङ आमा समूह प्रथम, ठिनी आमा समूह द्वितीय र जोमसोम महिला समूह तृतीय भए । हाजिरी जवाफको विजेतालाई उपाध्यक्ष जमुना रानागमरले पुरस्कार प्रदान गरिन् ।

अन्तर्राष्ट्रिय नारी दिवसका अवसरमा सरसफाई, स्वास्थ्य शिबिर, रैथाने बाली उत्पादनका परिकार प्रर्दशनी, प्रभातफेरी, सांस्कृतिक नृत्य प्रर्दशनी र महिलाहरुको लागि स्तन क्यान्सर सम्बन्धी सचेतनामूलक अभिमुखीकरण लगायतका कार्यक्रम आयोजना गरिएको घरपझोङ गाउँपालिकी महिला बालबालिका तथा ज्येष्ठ नागरिक शाखाकी प्रमुख सरिता थकालीले जानकारी दिइन् ।

दिवसका अवसरमा आयोजित प्रभातफेरीमा घरपझोङका महिला समूह, आमा समूह, महिला अधिकारकर्मी, सुरक्षा निकाय, पत्रकार, विभिन्न सरकारी तथा गैरसरकारी निकाय लगायतले सक्रिय सहभागी जनाएका थिए ।