पोखरा । पाोखरा महानगरपालिका दोश्रो अन्तर क्लब पुरुष टि–२० क्रिकेट प्रतियोगिता २०८१ को उपाधि लेखनाथ युथ क्रिकेट क्लबले जितेको छ । पोखरा महानगरपालिका शिक्षा महाशाखाको आयोजना तथा पोखरा महानगरपालिका क्रिकेट संघको संयोजन तथा व्यवस्थापनमा आयोजित प्रतियोगिताको फाइनलमा माछापुच्छ्रे क्रिकेट क्लवलाई ३० रनले पराजित गर्दै लेखनाथले उपाधि जितेको हो ।

लेखनाथको इडेन हेभन क्रिकेट मैदानमा सोमबार उपाधि भिडन्तमा लेखनाथ युथ क्लवले टस जितेर पहिले ब्याटिङ गर्दै निर्धारित २० ओभरमा ७ विकेट गुमाएर १५० रनको योगफल तयार गर्‍यो । लेखनाथका लागि पुष्पेन्द्र झाले ३२ बलमा ३२ रन, दीपक बरालले २३ बलमा २८ रन र मार्सल बरालले १८ बलमा २२ रनको योगदान दिएका थिए । लेखनाथलाई ठूलो स्कोर बनाउन नदिन रितेश बरालले २२ रन खर्चिएर ३ विकेट तथा धिरज अधिकारीले २५ रन खर्चेर २ विकेट लिएर दवाबमा राखेका थिए ।

१५१ रनको मध्यम लक्ष्य भेट्टाउन जवाफी ब्याटिङमा उत्रिएको माछापुच्छ्रे क्रिेकट क्लव निर्धारित २० ओभरमा ७ विकेट गुमाएर केबल १२० रनमा सिमित भएपछि उपबिजेतमा चित्त बुझाउन बाध्य भयो । माछापुच्छ्रेका आशिष न्यौपानेले २७ बलमा २३ रन र पूर्णबहादुर जिटीले १५ बलमा २२ रन बनाएपनि अन्य ब्याटर चल्न सकेनन् । फाइनल खेलमा माछापुच्छ्रेलाई कम रनमा समेट्न लेखनाथका मार्सल बरालले १४ रन खर्चेर २ विकेट हत्याएका थिए ।
सोमबारको फाइनल खेलको प्लेयर अफ दी म्याच मार्सल बराल बने । प्रतियोगिताको बेस्ट प्लेयर अफ द टुर्नामेन्ट उपाधि विजेता टिम लेखनाथ युथ क्लबका दीपक बराल बने । त्यस्तै, माछापुच्छ्रे क्रिकेट क्लबका प्रमोद बास्तोला बेस्ट बलर तथा कास्की क्रिकेट क्लबका आदित्य थापा बेस्ट ब्याट्सम्यान घोषित भए ।

उपाधि विजेता तथा विभिन्न विधामा उत्कृष्ट भएकाहरुलाई पोखरा महानगरपालिका क्रिकेट संघका अध्यक्ष वीरेन्द्र पुन, सदस्य अभिनय श्रेष्ठ लगायतले पुरस्कार वितरण गरे ।