पोखरा । पोखरा महानगरपालिका आर्थिक विकास महाशाखा अन्तरगतको व्यवसाय प्रवर्द्धन केन्द्र र लायन्स अन्तर्राष्ट्रिय डिस्ट्रिक्ट ३२५ एमको साझेदारीमा सञ्चालित विभिन्न सीपमूलक तालिमका सहभागीहरूलाई प्रमाण पत्र प्रदान गरिएको छ ।

सहायक योग प्रशिक्षक, सैलुन, बेकरी, सहायक स्टुडियो फोटोग्राफर र केयर गिभर सम्बन्धी सीपमूलक तालिमहरू सहभागी एक सय जना बढिलाई प्रमाण पत्र प्रदान गरिएको हो ।

पोखरा महानगरपालिकाले केन्द्र मार्फत विभिन्न साझेदार संस्थाहरूसँगको समन्वयमा सीपमूलक तालिमहरू उपलब्ध गराइरहेको नगर प्रमुख धनराज आचार्यले बताए । महानगर क्षेत्रभित्र बसोबास गर्ने बेरोजगार व्यक्तिहरूको लगत सङ्कलन गरी उनीहरूलाई आवश्यकताका आधारमा सीपमूलक तालिमहरू प्रदान गर्ने गरिएको उनले बताए ।

यस प्रकारका तालिमहरूले व्यक्तिलाई स्वरोजगार, उद्यमी र सेवाका लागि आवश्यक जनशक्तिहरूको उपलब्धतालाई सम्बोधन गर्न सहयोग पुग्ने उनले विश्वास व्यक्त गरे ।

केन्द्र मार्फत महानगरपालिकाले हजारौँ व्यक्तिहरूलाई विभिन्न सीपमूलक तालिमहरू प्रदान गरी सकेको छ । यस महानगर क्षेत्रको उद्यमशीलताको विकासमा महत्त्वपूर्ण योगदान गरेको छ ।