पोखरा ।
पृथ्वीनारायण (पिएन) क्याम्पसका पूर्व स्ववियु सभापतिहरु अहिले राजनीतिमा आफ्नो प्रभाव फैलाउँदै गर्दा अहिले यहीँ क्याम्पसमा आगामी स्ववियु चुनाव हुँदै छ । कुनै बेला पृथ्वीनारायण (पिएन) क्याम्पस स्ववियु सभापति भएका खगराज अधिकारी गण्डकी प्रदेशको मुख्यमन्त्री भइसकेका छन् । अधिकारी अहिले एमाले गण्डकी प्रदेश सभामा एमाले संसदीय दलका नेता हुन् ।

पोखरा महानगरपालिकाका मेयर धनराज आचार्य पनि सोही क्याम्पसको स्ववियु सभापति थिए । यही क्याम्पसको स्ववियु सभापति भइसकेका पदम गिरी संघीय सांसद छन् । पूर्व सभामुख कृष्णबहादुर महरा पिएन क्याम्पस स्ववियुका पूर्वकोषाध्यक्ष हुन् ।

राष्ट्रियसभाका अध्यक्ष गणेश तिमिल्सिना पिएन स्ववियुका पदाधिकारी थिए । दिवंगत पर्यटन मन्त्री रवीन्द्र अधिकारी पनि पिएन स्ववियुको सभापति भएका थिए । त्रिभुवन विश्वविद्यालयको आंगिक क्याम्पस पिएनको स्ववियु सभापति वा पदाधिकारी भएका थुप्रै जना सांसद र मन्त्री भइसकेका छन् ।

यो क्याम्पसको स्ववियुमा निर्वाचित हुन यसपालि थुप्रै विद्यार्थी आकांक्षी देखिएका छन् । विशेषतः पोखराका ६ वटा क्याम्पसमा स्ववियु निर्वाचन हुँदै आएको छ । पिएन, वन विज्ञान अध्ययन संस्थान, जनप्रिय बहुमुखी क्याम्पस, विन्दुवासिनी संस्कृत विद्यापीठ, पश्चिमाञ्चल इन्जिनियरिङ र पोखरा नर्सिङमा निर्वाचन हुँदै आएको छ ।

१६ वर्षपछि चुनाव हुन लागेको पृथ्वीनारायण क्याम्पसमा अनेरास्ववियु विराजत जोगाउने र अरु संगठन भत्काउने प्रयत्नमा छन्

Advertisement

त्यसमध्ये संस्कृत विद्यापीठमा मंगलबार संगठन दर्ता भयो । चुनाव भने १० गते तोकिएको छ । अन्य ५ वटा क्याम्पसमा मंगलबार उम्मेदवारी दर्ता भयो । यी क्याम्पसमा आगमी चैत ५ गते निर्वाचन तोकिएको छ । निर्वाचन गराउन त्रिविले ‘स्ववियु निर्वाचनसम्बन्धी निर्देशिका’ जारी गरिसकेको छ । निर्वाचनमा २८ वर्षे उमेर हद छ ।

चुनावको मिति नजिकिँदै गर्दा विद्यार्थी संगठनहरुले चुनावी गतिविधि बढाउँदै लगेका छन् । मंगलबार उम्मेदवारी दर्ताका बेला क्याम्पसहरुको माहोल झनै रोचक बनेको थियो । विभिन्न विद्यार्थी संगठनका उम्मेदवार समर्थकहरूका साथमा नाराबाजी गर्दै क्याम्पस प्रशासन कार्यालयमा पुगेका थिए ।

उम्मेदवारी दर्ताका क्रममा विद्यार्थी नेताहरूले आ–आफ्नो जित निश्चित रहेको दाबी गर्दै चुनावी रणनीतिसमेत प्रस्तुत गर्न भ्याए । उनीहरुले विद्यार्थीको हकहितका सवाललाई प्राथमिकतामा राखेर काम गर्ने प्रतिबद्धता जनाए । कसैले शिक्षाको गुणस्तर सुधार गर्ने प्रतिवद्धता जनाएका छन् भने कसैले क्याम्पसमा पूर्वाधार निर्माण, छात्रवृत्ति वृद्धि, यातायात सुविधामा सुधार, छात्रावास व्यवस्थापन जस्ता विषयलाई मुख्य एजेन्डा बनाएका छन् ।

पोखराका अरु क्याम्पसभन्दा पृथ्वीनारायण क्याम्पसको स्ववियु निर्वाचनलाई विशेष चासोका साथ हेरिएको छ । यो क्याम्पस नेपाली विद्यार्थी राजनीतिमा मात्र नभई मुलुकको मूलधारको राजनीतिमा समेत प्रभाव पार्ने थलोका रुपमा चिनिन्छ ।

यहीँबाट धेरैजसो राष्ट्रियस्तरका नेता उत्पादन भएका छन् । त्यसैले, यहाँको स्ववियु चुनावलाई विद्यार्थी राजनीतिमात्र नभई राष्ट्रिय राजनीति निर्माणको आधारशीलाका रुपमा समेत हेरिन्छ । अझ १६ वर्षसम्म हुन नसकेको चुनाव हुने माहोल बन्दा विद्यार्थी उत्साहित देखिन्छन् । यसअघि २०६५ सालमा नेकपा एमाले निकट अनेरास्ववियुबाट रश्मि आचार्य स्ववियु सभापति चुनिएका थिए । त्यसयता पृथ्वी नारायण क्याम्पसमा चुनाव हुन सकेको छैन ।

यसपालि अनेरास्ववियु आफ्नो विरासत जोगाउन कसिएको छ भने नेविसंघ, क्रान्तिकारी, एकीकृत समाजवादी निकट अनेरास्ववियू र स्वतन्त्र उम्मेदवारहरुले नेतृत्व छिन्न रणनीति बुनेका छन् । मंगलबार उम्मेदवारी दर्ता समयमा पार्टीका जिल्ला तहका नेताहरु पृथ्वीनारायण क्याम्पसमा देखिए । कांग्रेस कास्कीका अध्यक्ष किशोरदत्त बराल र एमाले कास्की अध्यक्ष वैनबहादुर अधिकारी क्षेत्री दिनभर जस्तो क्याम्पसवरिपरि देखिएका थिए ।