पोखरा ।
पोखरा महानगरभरि सडकमै थुप्रिएको फोहोर बिहीबारबाट उठ्ने भएको छ । पोखरा वडा नम्बर ३२, लामेआहालमा अस्थायी रुपमा फोहोरमैला व्यवस्थापन गर्दै आएकोमा स्थानीयले बारम्बार फोहोर व्यवस्थापनमा अवरोध गर्दै आएका छन् ।

एकातिर फोहोर व्यवस्थाका लागि यसअघि भएको १८ महिने सम्झौताको अवधि सकिएको छ भने अर्कातिर स्थानीयहरुले आफ्‌ना माग सम्बोधन गर्न ढिलाइ भएको गुनासो गरेका छन् । महानगरको मंगलबार बसेको कार्यपालिका बैठकले स्थानीयका मागहरु सम्बोधन गर्न एक समिति बनाउने निर्णय गरेको थियो ।

स्थानीयका मागमध्ये वडा, महानगर, प्रदेश र संघबाट सम्बोधन हुने खालका माग छुट्टयाएर सोही अनुसार सम्बोधनको पहल लिने महानगरको प्रतिबद्धता छ । मंगलबारको कार्यपालिका बैठकअघि मेयर धनराज आचार्य, प्रवक्ता मोतीलाल तिम्सिनासहितको टोलीले पोखरा ३२ पुगेर स्थानीयसँग छलफल गरेको थियो । पोखरा ३२ का वडाध्यक्ष अक्कलबहादुर कार्कीले बिहीबार बिहानबाट फोहोर उठ्ने उल्लेख गरे ।

पोखरा महानगरको फोहोर संकलनको जिम्मेवारी ६ निजी कम्पनीले लिएका छन् । ती कम्पनीका ३० वटा गाडी फोहोर लिएर दैनिक लामेआहाल जाने गरेका छन् । महानगरका सरसफाइ महाशाखा प्रमुख बलराम पाठक पोखरामा दैनिक औसत २ सय टन जति फोहोर उत्पादन हुने बताउँछन् ।

स्थायी ल्याडफिल साइट निर्माण नभएसम्म पोखरा महानगरले लामेआहालमा फोहोर फाल्दै आएकोमा बारम्बार समस्या आउने गरेको छ । महानगरले २०२३ जनवरीबाट पोखरा अन्तर्राष्ट्रिय विमानस्थल सञ्चालनमा आएपछि पोखरा १४, बाच्छेबुडुवाको ल्याडफिल साइट बन्द गर्नुपरेको थियो । महानगरले वडा नम्बर ३३ को पुँडिटार क्षेत्रमा रहेको झाक्रीखोला र देव्रेखोला क्षेत्रमा ल्याडफिल साइट बनाउन निर्णय गरिसकेको भए पनि त्यो योजनाअघि बढ्न सकेको छैन ।