पोखरा ।
नेपाल–चीन कूटनीतिक सम्बन्ध स्थापना ७० वर्ष पुगेको अवसरमा चीनको छेन्दुबाट पोखरा अन्तर्राष्ट्रिय विमानस्थलमा नियमित व्यावसायिक चार्टर उडान हुने भएको छ।

सिचुआन प्रान्तको सहयोगमा सिचुआन एयरलाइन्सले मंगलबारदेखि पोखरा अन्तर्राष्ट्रिय विमानस्थलमा पहिलो पटक नियमित व्यावसायिक चार्टर उडान गर्ने भएको हो।

यस उडानले नेपाल र चीनबीचको हवाई सम्पर्कलाई अझ प्रभावकारी बनाउँदै पर्यटन प्रबद्र्धन, सांस्कृतिक आदान–प्रदान, र व्यावसायिक सहकार्यलाई नयाँ उचाइमा पुर्‍याउने नेपाल पर्यटन बोर्डको विश्वास छ ।

पोखरा–छेन्दु उडानले मध्य र पश्चिम नेपालका यात्रुहरूका लागि कम खर्चमा सहज यात्रा अवसर प्रदान गर्नुका साथै चिनियाँ पर्यटकहरूलाई सुन्दर पोखराको अवलोकन गर्न मद्दत गर्नेछ,’ बोर्डले जारी गरेको विज्ञप्तिमा उल्लेख छ।

‘नयाँ हवाई सम्पर्कले चीनले घोषणा गरेकाे ‘भिजिट नेपाल २०२५’ तथा नेपाल सरकारले अघि बढाएको ‘पोखरा पर्यटन वर्ष’ अभियानलाई सशक्त समर्थन प्रदान गर्नेछ। साथै, यसले नेपालमा अन्तर्राष्ट्रिय पर्यटकहरुको आगमनलाई उल्लेखनीय रुपमा वृद्धि गर्न महत्त्वपूर्ण भूमिका खेल्नेछ।’