पोखरा ।
सामुदायिक सेवा केन्द्र तथा सामुदायिक प्रहरी सेवा पोखरा ९ पृथ्वीचोकले कार्यसमितिका सदस्य, सहयोग उपसमिति, टोल विकास संस्था, आमा समूहलाई लक्षित गरी लागुऔषध रोकथाम तथा नियन्त्रणको लागि अभियान चलाएको छ ।

सोही अभियान अन्तर्गत सामुदायिक सेवा तथा सामुदायिक प्रहरी सेवा जिल्ला समन्वय समिति कास्कीसँगको सहकार्यमा लागुऔषधसम्बन्धी प्रशिक्षण गरिएको छ । समुदाय–प्रहरी साझेदारी कार्यक्रम अन्तर्गत लागु औषध निस्तेज अभियानसम्बन्धी टोल टोलमा प्रहरी अभियानको क्रममा कार्यक्रम गरेको सामुदायिक सेवा केन्द्र पृथ्वीचोकका अध्यक्ष कमलबहादुर श्रेष्ठले जानकारी दिए ।

कार्यक्रममा सामुदायिक प्रहरी सेवा जिल्ला समन्वय समिति कास्कीका इञ्चार्ज प्रहरी वरिष्ठ नायव निरीक्षक होतबहादुर रोकाहले लागुऔषधको अवैध ओसारपसार, सेवन तथा कारोबारले समुदायमा परेको असरका बारेमा प्रकाश पारेका थिए ।

कार्यक्रममा सेवा केन्द्रका पदाधिकारी, कार्यसमितिका सदस्य, सहयोग उपसमितिका सदस्य, कार्यरत प्रहरी कर्मचारीका अलवा पोखरा महानगरपालिका वडा नम्बर ७, ८ र ९ का टोल विकास संस्था, आमा समूहका पदाधिकारी र सदस्यको सहभागिता थियो ।