पोखरा । नेपाली बजारमा भारतीय विद्युतीय स्कुटर एथरको नयाँ ब्रान्ड भित्रिएको छ । वैद्य अर्गनाइजेसनले आइतबार २.९ किलोवाट आवर र ३.७ किलोवाट आवर गरी २ ब्याट्री विकल्पमा एथर ४५० मोडल स्कुटर सार्वजनिक गरेको हो ।

विद्युतीय स्कुटरमा ब्याट्रीको समस्या देखिने भएकाले एथरका स्कुटरमा प्रयोग गरिएका ब्याट्रीमा केही समस्या देखिएमा नयाँ ब्याट्री उपलब्ध गराउने बताइएको छ । एथर स्कुटरमा गुगल म्याप, मल्टी–स्टप ट्रिप प्लानर, ब्लुटुथ कल तथा म्युजिक कन्ट्रोल लगायतका फिचर रहेका छन् । दुर्घटना, टुटफुट, पन्चर अथवा चार्ज सकिएको समयमा समेत भारतमा एथरले सातै दिन चौबीसै घण्टाको इमर्जेन्सी सहायता दिने प्रतिवद्धता समेत जनाएको छ ।

अथरको पोखरामा आधिकारिक विक्रेता अटोवेज प्रालिले पोखरामा आइतबार यसको बिक्री सुरुआत गरिने अटोवेजकी निर्देशक तथा प्रमुख कार्यकारी अधिकृत सन्ध्या पौडेलले बताइन् । उनले भनिन्, ‘आज काठमाडौंमा यसको आधिकारिक सुरुआत भएको छ । पोखरामा यसको बिक्री आइतबार देखि हुनेछ ।’ अथरले नयाँ स्कुटर रिज्ता पनि छिट्टै बजारमा ल्याउने जानकारी दिएको छ ।

पछिल्लो समय धेरैले रुचाएको एथरले पछिल्लो जीवनशैलीलाई बुझेर इलेक्ट्रोनिक स्कुटर बनेको उनको भनाइ छ । बिक्री पछिको सेवालाई प्राथमिकतामा राख्दै चाउथेमा सर्भिस सेन्टर स्थापना भइरहेको निर्देशक पौडेलले जानकारी दिइन् ।

एथर अविश्वसनीय फिचरको कारण चर्चामा रहेको इलेक्ट्रिक स्कुटर हो । एथरको नेपालका लागि एकमात्र आधिकारिक बिक्रेता वैद्यज इनर्जी हो । झम्सिखेलको सोरूमलगत्तै पोखरामा पनि एथरको सोरूम (एक्सपेरियन्स सेन्टर) सञ्चालनमा ल्याइएको निर्देशक पौडेलले बताइन् । सोरूमसँगै फास्ट चार्जिङसमेत यहाँ राखिएको छ ।