पोखरा । पोखरामा पहिलो पटक भइरहेको नाडा प्रिजेन्ट्स वाडा अटो सो २०२५ मा अटो सोमा शनिबारसम्म अनुमानित २० हजार दर्शकले अवलोकन गरिसकेको कार्यक्रमका प्रचार संयोजक विनय थापाले जानकारी दिएका छन् । आइतबार अन्तिम दिन पनि भएकाले एसइई दिएर बसेका विद्यार्थीहरुलाइ अटो शोमा प्रवेश निशुल्क गरिएको थापाले बताए ।

उनकै भनाइमा १९ वटा ब्राण्डका ४–पाङ्ग्रे, ६ वटा ब्रान्डका लाइट कमर्सियल, ७ वटा ब्रान्डका २–पाङ्ग्रे लगायत लुब्रिकेन्ट, टायर, ग्यारेज उपकरण, अन्य एशोसेरिजहरू तथा वित्तीय संस्थाहरूका २० वटा स्टलहरू रहको अटो सोमा इभी गाडीप्रति आगन्तुकको बढी चासो देखिएको छ ।

अटो शोमा भेटिएका न्युरोडका श्याम मल्लले अहिले प्रयोग गरिरहेको पेट्रोल गाडीलाई एक्सचेन्ज गरेर इभी गाडी बुक गरेको सुनाए । उनले पेट्रोल गाडीले इन्धन खर्चका साथै वातावरणमा पनि असर गर्ने र सम्भार खर्च पनि बढने हुँदा इभि गाडी तर्फ रुची बढेर बुकिङ गरेको बताए । यसै गरि अटो सोमा इभीका नयाँ फिचर सहितका सवारीसाधन बुक गर्न आएका मोहोरिया टोलका कमल श्रेष्ठले पनि समय अनुसारको परिवर्तन चाहनेले इभी गाडी मन पराउने बताए ।