पोखरा । नेकपा (एमाले) जिल्ला कमिटी कास्कीले गणतन्त्रको पक्षमा जागरण अभियान २०८१ अन्तर्गत सोमबार बृहत मोटरसाइकल र्‍याली निकालेको छ । देशव्यापी अभियान अन्तर्गत पोखराको प्रर्दशनी केन्द्रमा भेला भएर मोटरसाइकल र्‍याली सुरु भएको हो । मोटरसाइकल र्‍यालीले पोखराको विभिन्न भागको परिक्रमा गरेको एमाले जिल्ला कमिटी कास्कीका अध्यक्ष बैनबहादुर अधिकारी क्षत्रीले जानकारी दिए ।

एमालेको मोटरसाइकल र्‍याली पृथ्वीचोक, मुस्ताङचोक, बिरौटा, राष्ट्रबैंकचोक शहिदचोक, लेकसाइड, हल्लनचोक, जिरोकिमी, सिर्जनाचोक, सभागृहचोक, चिप्लेढुंगा, सिद्धार्थचोक, भैरवटोल, विन्ध्यवासिनी, ट्याक्सीचोक, पृथ्वीनारायण क्याम्पस गेट, नदिपुर, महेन्द्रपुल रानीपौवा, हस्पिटलचोकहुँदै अमरसिहंचोकमा पुगेर सभामा परिणत भएको छ ।

एमालेले देशभरका जिल्ला सदरमुकाम र प्रमुख शहरहरुमा गणतन्त्रका पक्षमा जागरण सभा तथा मोटरसाइकल ¥यालीको निकालेको छ । गणतन्त्रको पक्षमा जागरण अभियान अन्तर्गत एमालेले कास्कीका ७२ वटै वडामा जागरण कार्यक्रम गरेको छ । नेपाल बुद्धिजीवी परिषद्, पेशागत महासंघ नेपाल लगायतका जनसंगठनको अगुवाईमा वर्तमान सरकारले गरेका महत्वपूर्ण काम, उपलब्धी, आगामी कार्ययोजना सहित गणतन्त्रको पक्षमा नागरिक सम्वाद कार्यक्रम तय गरेको छ ।

एमाले कास्कीले आगामी चैत ३० गते चिप्लेढुंगामा गणतन्त्रको पक्षमा बृहत जागरण सभा गर्ने निर्णय गरेको छ । । पार्टीको केन्द्रीय सचिवालयको ४६ औं बैठकको निर्णय अनुसार एमाले कास्कीले वडा केन्द्रीत पार्टी निर्माण अभियान गरेको छ ।