पोखरा ।
६८औँ राष्ट्रिय सहकारी दिवसको अवसरमा पामे बचत तथा ऋण सहकारीले पामे बजारमा सरसफाइ कार्यक्रम गरेको छ । पोखरा–२४ पामे बजारमा सहकारीका सदस्यसहित स्थानीय, प्रहरी र आमा समूह मिलेर सरसफाइ गरेका हुन् ।

सरसफाइ अभियानमा फेवा क्लब पामे, फेवा आमा समूह पामे, सिर्जनशील आमा समूह पामे, प्रहरी चौकी पामेलगायतको सक्रिय सहभागिता थियो । ‘मर्यादित सहकारी, समुन्नत समाज’ भन्ने मूल नाराका साथ ६८औँ राष्ट्रिय सहकारी दिवस बुधबार मनाइँदै छ ।

पामे बजार फेवातालको मुहान क्षेत्रका साथै पर्यटकीय स्थल भएकाले पनि सरसफाइमा ध्यान दिँदै आफूहरूले सरसफाइ गरेको सहकारीका अध्यक्ष नवराज पराजुलीले जानकारी दिए । उनले सहकारीले सामाजिक क्षेत्रमा पनि बेलाबेला विभिन्न काम गर्दै आएको बताए ।

पामे बजारमा रहेका विभिन्न प्लास्टिक, बोतललगायतका फोहोरहरू भेटिएको सहकारीका व्यवस्थापक सूर्यमोहन पराजुलीले बताए । उनले पामे बजारलाई सधैँ सफा राख्नुपर्ने बताउँदै बजारको फोहोर फेवातालमा जाने भएकाले पनि सफा राख्नुपर्नेमा जोड दिए ।

सहकारीमा १ हजार १० जना सेयर सदस्य छन् । अधिकृत पुँजी १५ करोड, चुक्ता पुँजी १० करोड १० लाख रहेको छ । आर्थिक वर्ष २०८०/८१ मा १७ करोड ९ लाख ७८ हजार निक्षेप संकलन गरी २५ करोड ४ लाख १६ हजार कर्जा प्रवाह गरेको छ ।