पोखरा । कवि तथा गीतकारको छवि बनाएकार शिव पलाँसले औपचारिक रुपमा गायन थालेका छन् । उनले आफ्नै सिर्जना ‘तिम्रो सुनको हात्ती’मा स्वर दिएका हुन् ।

केशव बादीको संगीत र संगीत संयोजन रहेको यो गीत पलाँस क्रियसन नामको युट्युब च्यानलबाट सार्वजनिक भएको छ । दुई दशकदेखि साहित्यमा सक्रिय उनको गीति सञ्चयन ‘माया गर्नुको अर्थ’ प्रकाशित छ ।

उनका चार दर्जनभन्दा बढी गीत बजारमा आइसकेका छन् । माया गर्नुको अर्थ, बेहोशीमै छोडी गयौ, गन्दै जादा पिरतीमा, खोकी लाग्दा हर्राे, काली मोरीले आदि उनका लोकप्रिय गीत हुन् । अखबारी लेखनमा समेत सक्रिय पलाँसले आफूले स्वर दिएको गीतबाट पाएको प्रतिक्रियाले उत्साहित बनाएको सुनाए ।

मान्छे पैसामुखी र बनावटी बन्दै जाँदा मानवता हराउँदै विषयवस्तु नयाँ गीतमा छ । स्याङ्जाको हरिनास गाउँपालिका १, किचनाशमा जन्मिएका अधिकारी अहिले अमेरिकामा बसोबास गर्छन् । उनी गीतसहित कविता, मुक्तक, गजल लेखनमा समेत सक्रिय छन् ।

गायक सन्तोष रुचालको स्वरमा बजारमा आएको ‘बेहोसीमै छोडी गयौ’ उनको पहिलो रेकर्डेड गीत हो भने ‘माया गर्नुको अर्थ सिउँदो भर्नु होइन’ले उनलाई पृथकपनका गीतकारको परिचय दियो ।