पोखरा ।
नेकपा (एमाले)ले लोकतान्त्रिक गणतन्त्रलाई संस्थागत गर्न बृहत जागरण सभा गर्न लागेको छ । एमालेले गणतन्त्रको पक्षमा राष्ट्रिय जागरण अभियान २०८१ अन्तर्गत यही चैत ३० गते जागरण सभा गर्ने निर्णय गरेको हो ।

पोखराको चिप्लेढुंगामा सभा गर्न लागेको एमाले जिल्ला कमिटी कास्कीका अध्यक्ष बैनबहादुर अधिकारी क्षत्रीले जानकारी दिए । एमाले स्थायी कमिटीका सदस्य खगराज अधिकारीले प्रतिगामी हर्कत विरुद्ध जनतालाई सचेत पार्दै लोकतान्त्रिक गणतन्त्र र नेपालको संविधानको रक्षाको लागि एमालेले प्रर्दशन गरेको बताए ।

एमाले जिल्ला कमिटी कास्कीले आइतबार आयोजना गरेको कार्यक्रममा उनले लोकतान्त्रिक गणतन्त्रको पक्षमा जनमत सिर्जना गर्न पार्टीले देशव्यापी रुपमा सचेतना, जनप्रर्दशन र जागरण सभा गर्न लागेको जानकारी दिए । ‘प्रतिगामी र व्यवस्था विरोधी गतिविधिलाई निस्तेज पार्न एमालेको अगुवाई गणतन्त्रको पक्षमा जागरण अभियान भएको छ,’ उनले भने, ‘लोकतान्त्रिक गणतन्त्र र नेपालको संविधानको रक्षाका लागि सबै राजनीतिक दल, नागरिक समाज र आम नेपाली जनसमुदाय एकजुट हुन आवश्यक छ ।’

उनले एमालेको अभियानलाई गणतन्त्रका पक्षधर सबै दललाई साथ र सहयोग गर्न आग्रह गरे । उनले अभियानमा युवा विद्यार्थी, नागरिक समाज, आदिवासी, जनजाति,उत्पीडित, आधारभूततहका समुदायसम्म पुग्न आग्रह गरे । नेता अधिकारीले आकर्षक नारा तय गरेर सांस्कृतिक झाँकीसहित प्रर्दशन गर्न अनुरोध गरे ।

एमालेका केन्द्रीय सदस्य कृष्ण थापाले जिल्ला कमिटी कास्कीको अगुवाईमा हुने प्रतिगमन विरुद्धका जागरण सभामा गण्डकी प्रदेश स्तरका नेता तथा कार्यकर्ताको सहभागिता हुने बताए ।

एमाले जिल्ला कमिटी कास्की अध्यक्ष अधिकारीले पोखरा सभागृह, नदिपुर र रानीपौवाबाट बाजागाजा झाँकीसहित निस्कने जुलुस चिप्लेढुंगामा पुगेर सभामा परिणत हुने बताए ।

कार्यक्रममा एमालेका केन्द्रीय सदस्यहरु चूडामणि जंगली, मीनाकुमारी गुरुङ, एमाले कास्कीका उपाध्यक्ष भेषराज बराल, सचिव दर्शन लामाले जागरण सभाको तयारीको बारेमा बोलेका थिए ।

तीन महिने वडा केन्द्रीत अभियान चलाएको एमालेले चैत ११ देखि ३० गतेसम्म प्रदेश र जिल्ला तहमा प्रतिगामी हर्कतका विरुद्धमा सचेतना, जनप्रर्दशन र जागरण सभा गर्ने निर्णय गरेको छ । एमालेले चैत २४ देखि ३० गतेसम्म गणतन्त्रको पक्षमा देशका विभिन्न ७ सहरमासभा गर्न लागेको छ ।

एमालेले गणतन्त्रका पक्षमा चैत १८ गते जागरण सभा तथा मोटरसाइकल र्‍यालीको निकालेको छ । गणतन्त्रको पक्षमा जागरण अभियान अन्तर्गत एमालेले कास्कीले चैत ११ गते स्थानीय तहका वडामा जागरण कार्यक्रम गरेको छ ।