पोखरा ।
१३ औं संस्करणको राष्ट्रिय हेमजा आलु महोत्सवमा बनाइएको आलुको पहाडसँगै तस्बिर खिच्नेहरुको घुइँचो छ । कतिपय सेल्फीमा रमाएको भेटिन्छ भने कतिपयलाई आलुको पहाडसँग माया साट्दै तस्बिर कैद गर्न भ्याइनभ्याई छ ।

चैत २४ गतेबाट सुरु भएको १३ औं महोत्सव वैशाख ३ गतेसम्म चल्नेछ । मंगलबारसम्म २५ हजार भन्दा बढीले आलु महोत्सव अवलोकन गरेकोमा ४ सय ५० घरपरिवारले आलु खरिद गरेको आलु तथा कृषि उपज व्यवस्थापन उपसमिति संयोजक जयराम तिम्सिनाले जानकारी दिए ।

५ लाखभन्दा बढीको आलु कारोबार भइसकेको छ । महोत्सवमा मंगलबार रत्यौली गीत प्रतियोगिता सुरु भयो । सँगसँगै कलाकारहरु खुमन अधिकारी, जीवन दाहाल, नवीन पौडेल, नवीना सुवेदी, अमर धिताल, परशुराम अधिकारी, शान्ता बर्देवा, हास्य कलाकार दीपक थापाका प्रस्तुति रहे ।

बुधबार कलाकारहरु ज्योति मगर, जीवन दाहाल, रामजी पौडेल, तुलसा क्षत्री, सुमन खड्का, परशुराम अधिकारी, दुर्गा क्षत्री तथा हास्य कलाकारहरु युवराज भण्डारी र राजेन्द्र नेपाली प्रस्तुति रहने मूल आयोजक समितिका अध्यक्ष वसन्तकुमार श्रेष्ठले जानकारी दिए । मंगलबारसम्म २५ लाखको कारोबार भएको आयोजकले जनाएको छ ।