जोमसोम । मुस्ताङको जोमसोममा बन्ने २५ शयाको प्रदेश अस्पताल भवन निर्माण अन्तिम चरणमा पुगेको छ । गण्डकी प्रदेश सरकारको लगानीमा २०७७ चैत २२ गते मुस्ताङको जोमसोममा २५ शय्याको प्रदेश अस्पताल भवन शिलान्यास गरिएको थियो ।

अहिले अस्पतालको भौतिक प्रगति ९५ प्रतिशत पुगेको छ । बहुवर्षीय योजनाका रुपमा निर्माण थालिएको जोमसोम स्थित साँढे दुई तले अपांगमैत्री प्रदेश अस्पताल भवनको ठेक्का लागत १२ करोड छ । निर्माण कम्पनी इमोटल जेभीले यहाँ प्रदेश अस्पताल भवन बनाउने जिम्मा लिएको छ ।

प्रदेश अस्पताल भवन ४ वर्षपछि अन्तिम चरणमा पुगेको अस्पतालका निमित्त मेडिकल सुपरिटेन्डेन्ट डा तेजेस नेपालले जानकारी दिए । सम्झौता अवधि २ वर्ष रहे पनि प्राविधिक समस्या, बजेट अभाव र निर्माण कम्पनीको ढिलासुस्तीले निर्माणमा ढिलाई हुन पुगेको अस्पतालका निमित्त मेडिकल सुपरिटेन्डेन्ट नेपालको भनाइ छ ।
२ पटकसम्म म्याद थप भइसकेको अस्पताल भवन अब भने सम्पन्न हुने छनक देखिएको छ । यसअघि निर्माण कम्पनीले काममा ढिलासुस्ती गर्दा प्रदेश सरकारबाट विनियोजित बजेटसमेत फ्रिज हुने गरेको थियो ।

भवन निर्माणको जिम्मा पाएको इमोटल कन्ट्रक्सन जेभीका सबइन्जिनियर निश्चल खनालले अस्पतालको भौतिक प्रगति ९७ प्रदेश पुगेको दावी गरे । उनले अस्पताल भवनको भौतिक सरचना, जस्ता, सिलिङ, रंङ्गरोगन लगायतको काम सकिएको जनाए । अस्पताल भवनका लागि झ्याल, ढोका फिटिङ गर्ने र खानीपानीको पाइप लाइन जडान गर्ने कार्यमात्रै बाँकी रहेको उनको भनाइ छ ।

पछिल्लो समय सडक तथा हवाई मार्ग सहज हुँदै गएपछि मुस्ताङमा पर्यटकको आवागमन बढ्दै गएको छ । मुस्ताङ भित्रिने पर्यटक तथा स्थानीयको स्वास्थ्य सेवालाई सहज र सरल बनाउन भवन निर्माणसँगै अस्पताल स्तरोन्नति गर्न लागिएको हो ।

नयाँ प्रदेश अस्पताल भवनमा कार्यालय प्रमुख कक्ष, प्रशासन कक्ष, बैठक हल, ओपिडी कक्ष, आकस्मिक कक्ष, प्रसूति कक्ष, ल्याब, एक्सरे कक्ष, फार्मेसीसहित विभिन्न समस्याका बिरामीलाई सेवा पुर्‍याउने गरी पूर्वाधार निर्माण गरिएको छ । भवनको माथिल्लो तलासम्म बिरामी लैजान ह्विल चियर गुडाउन मिल्ने पूर्वाधार तयार गरिएको छ ।

अहिलेको जीर्ण अवस्थाको भवनबाट सेवाग्राहीलाई परेको समस्या निराकरण गर्न अस्पतालको नयाँ भवनले सघाउने विश्वास गरिएको छ । जीर्ण भवनबाट सेवा प्रवाह हुँदा आउने बिरामीलाई निकै सास्ती छ । अस्पतालमा शय्या थपसँगै भवन स्तरोन्नति गर्ने र अस्पतालमा सेवा लिन आउने बिरामीलाई सहज ढंगले सेवा प्रवाह गर्न सकिने गरी मुस्ताङ स्थित प्रदेश अस्पतालको नयाँ भवनले सघाउने अपेक्षा गरिएको छ ।

प्रदेश अस्पताल भवन निर्माण अन्तिम चरणमा पुगे पनि अस्पतालसम्म सवारी साधन लैजान मिल्ने सडकसहज छैन । अस्पताल सडकका लागि जग्गा विवाद हुँदा अस्पताल जाने बाटो निर्माणमा समस्या परेको छ ।