पोखरा । सिटिजन बैंकले पोखरा महानगरपालिका वडा नम्बर १७ मा रहेको हिमालय आँखा अस्पताललाई कुर्सी हस्तान्तरण गरेको छ । बिहीबार आयोजित कार्यक्रममा बैंकका प्रमुख कार्यकारी अधिकृत गणेशराज पोखरेलले हिमालय आँखा अस्पताल व्यवस्थापन समिति अध्यक्ष वरिष्ठ अधिवक्ता सुरेन्द्र थापामगरलाई कुर्सी हस्तान्तरण गरे ।

बैंकले १६ सिट भएका कुर्सी एक लाखमा खरिद गरी अस्पताmलाई प्रदान गरेको सिटिजन बैंक विरौटा शाखाका प्रबन्धक अनुप अधिकारीले बताए । कार्यक्रममा प्रमुख कार्यकारी अधिकृत पोखरेलले सेवाग्राहीको विशेष चाप रहने आँखा अस्पताललाई सामाजिक उत्तरदायित्व बहन गर्दै कुर्सी हस्तान्तरण गरिएको जनाए ।

सिटिजन बैंकका देशभर २ सय शाखा छन् । पोखरा महानगरमा मात्रै ४ शाखा सञ्चालन गरेको बैंककले गण्डकीका ८ जिल्लामा शाखा विस्तार गरिसकेको छ । अस्पताल व्यवस्थापन समिति अध्यक्ष थापामगरले सहयोगका लागि आभार प्रकट गर्दै आगामी दिनमा पनि सहकार्य र समन्वय रहने अपेक्षा गरे ।

पोखराको घारीपाटनमा रहेको आँखा अस्पतालले गण्डकी प्रदेश र कर्णाली प्रदेशमा सेवा दिने गरेको छ । नेत्र ज्योति संघ कास्कीले सञ्चालन गरेको यो अस्पतालले बिरामी जाँचका अतिरिक्त आँखासम्बन्धी औपचारिक शिक्षा र दुर्गम क्षेत्रमा आँखा शिविरहरु गर्दै आएको छ ।