पोखरा ।

नयाँ वर्ष २०८२ को अवसरमा सोमबार पोखराको महेन्द्रपुलस्थित अन्तर्राष्ट्रिय झण्डापार्कमा झन्डा झन्डोत्तोलन गरिएको छ। पोखरा महानगरपालिकाका मेयर धनराज आचार्यले नेपालको राष्ट्रिय झन्डा फहराएका हुन् ।

नगर प्रमुख आचार्यले सहकार्य, समझदारी र साझा सपना बोकेर अगाडि बढ्न सबैलाई आह्वान गरे। उनले नयाँ वर्षको सुरुवातसँगै सबै योजना समयमै सुरु हुने र तोकिएको समयमा सम्पन्न हुने विश्वास व्यक्त गर्दै अनुशासन र कर्तव्यबोधमार्फत समृद्धिको शिखरतर्फ सँगै अघि बढ्नुपर्ने आवश्यकता औंल्याए ।

‘समयको यथार्थ र संस्कृतिको सम्मान गर्दै निर्धारित समयमा सुरु भएका कर्महरूले हामीलाई कर्तव्य, अनुशासन र आशाको बाटो देखाउँछन्,’ नगर प्रमुख आचार्यले भने । उनले साझा उद्देश्य प्राप्तिका लागि सबैलाई एकताबद्ध भई अघि बढ्न आग्रह गरे ।

कार्यक्रममा पोखरा महानगरपालिका वडा नम्बर ९ का वडाध्यक्ष दीपेन्द्र मर्सानी, जनप्रतिनिधि, नगर कर्मचारी लगायतको उपस्थिति थियो।