पोखरा ।
पोखरा–२६ स्थित सिलिंगेमा नेपाली साहित्यकार भैरव अर्यालको सम्मानमा ‘भैरव अर्याल स्मृति बाटिका’ निर्माण हुने भएको छ । वडाध्यक्ष नरेन थापाको योजना र पहलमा उक्त परियोजनाको सुरुआत गरिएको हो ।

वडाको पहलमा १० लाख रुपैयाँ विनियोजन गरी कार्यारम्भ गरिएको वडाध्यक्ष थापाले बताए । उनले तीन वटै तहका सरकार, कला अनुरागी, साहित्यप्रेमी, अन्य सामाजिक संघ–संस्था तथा भैरव अर्यालका प्रशंसकहरूलाई सक्रिय सहभागिता र सहकार्यका लागि सार्वजनिक अपिल गरेका छन् ।

अर्याल हाँस्य–व्यंग्य निबन्धकार, शिक्षक तथा समाज चिन्तक थिए । उनले कन्धनीडाँडा र वरपरको क्षेत्रमा शिक्षाको विकासमा अतुलनीय योगदान दिएका थिए । अर्याल ‘जय भुँडी’, ‘राजीनामा’, ‘टेढो ऐना’, ‘साझा निबन्ध’, ‘भैरव अर्यालका हास्य–व्यंग्य’, ‘कारिन्दाको दिनचर्या’, ‘साझा कथा’ लगायत दर्जनौँ कृतिका रचयिता हुन् ।

यो स्मृति पार्क भैरव अर्यालको गहन साहित्यिक योगदान, शिक्षण जीवन र सामाजिक चेतनाको स्मरणमा समर्पित हुने लेखक गनेस पौडेल बताउँछन् । पार्कमा उनको जीवन र कृतित्व झल्काउने प्रदर्शनी स्थल, विश्राम क्षेत्र, खुला वाचन स्थल तथा स्थानीय बासिन्दा र आगन्तुकलाई शान्त, सिर्जनात्मक र प्रेरणादायी वातावरण प्रदान गर्ने अन्य संरचना निर्माण गरिने भएको छ ।

परियोजनालाई भविष्यमा थप विस्तार गरी ‘सिर्जनाग्राम’ का रुपमा विकास गर्ने योजना पनि अघि सारिएको छ । जहाँ लेखक, शोधकर्ता र कलाकारहरुले आफ्नो सिर्जनात्मक तथा सन्धानात्मक क्रियाकलाप गर्न सक्नेछन् ।