पोखरा ।
जिल्ला समन्वय समिति कास्कीले बालगृहका सञ्चालकहरुसँग आइतबार अन्तरक्रिया गरेको छ । राष्ट्रिय बाल अधिकार परिषद काठमाडौंको समन्वयमा कार्यक्रम भएकाे हाे ।

जिल्ला समन्वय समिति कास्कीका प्रमुख लिलाधर पौडेलले बालगृहका कर्मचारीलाई अनिवार्य नियुक्तिपत्र सहित न्युनतम पारिश्रमिक प्रदान गर्न साथै सामाजिक सुरक्षा कोषमा आवद्ध हुन आग्रह गरे ।

पौडेलले बालश्रम रहित बालगृह बनाउन आग्रह गर्दै सुरक्षित र व्यवस्थित बालगृह निर्माणका लागि आ आफ्नो क्षेत्रबाट कार्य सम्पादन गर्नुपर्ने बताए । उनले बालगृह सहित राज्यद्वारा नियन्त्रीत र निर्देशित सबै निकाय मानव अधिकारको पूर्ण पालना सहित श्रम ऐन ,कानुन र निर्देशिकाको पालनामा गम्भीर हुनुपर्ने उल्लेख गरे ।

श्रम कार्यालय पोखराका वरिष्ठ श्रम अधिकृत सुरेश ढकालले बालश्रम रहित प्रदेश बनाउनेतर्फ सबैजना केन्द्रित हुनुपर्ने बताए ।राष्ट्रिय बाल अधिकार परिषद गण्डकीका प्रदेश समन्वय अधिकृत बद्री वाग्लेले कास्कीका बालगृहहरुको अवस्था र चुनौतीका बारेमा जानकारी दिएका थिए ।

कार्यक्रममा समितिकी उप प्रमुख सरिता मालले स्वागत मन्तव्य राखेकी थिइन् भने सहिजकरण जिल्ला समन्वय अधिकारी नवराज बरालले गरेका थिए ।

कार्यक्रममा सरोकारवाला र नियामक निकायका प्रमुख तथा प्रतिनिधिहरुको सहभागीता थियो।