पोखरा । विद्यार्थी र शिक्षक केन्द्रित विभिन्न कार्यक्रम गर्दै आएको नेपाली भाषा शिक्षक परिषद्,कास्की नेपालले आफ्नो नियमित कार्यक्रमअन्तर्गत विद्यालय तहका शिक्षकहरूलाई ध्यानमा राखेर नेपाली भाषा शिक्षणसम्बन्धी तालिम सम्पन्न गरेको छ ।

संस्थाका अध्यक्ष सूर्यप्रसाद लम्सालको अध्यक्षतामा सम्पन्न भएको उक्त कार्यक्रममा कास्की जिल्लाका संस्थागत र सामुदायिक विद्यालयका करिब २०० शिक्षकहरूको सहभागिता थियो । उक्त तालिमको प्रशिक्षकका रूपमा प्राडा रामनाथ ओझा, माधवशरण उपाध्याय, उप प्राडा बोधराज ढकाल, लोकचन्द्र खनाल, डोलराज अर्याल र डिल्लीराम अर्याल थिए ।

शिक्षा विकास निर्देशनालय गण्डकी प्रदेशका प्रमुख घनश्याम पौडेलले प्रमुख आतिथिको रूपमा बोल्दै परिषद्ले गरेको यस्तो कार्यको प्रशंसा गर्दै संस्थासँग जोडिएर सहकार्य गर्न आफू तयार रहेको बताए । परिषद्ले यस्ता कार्यक्रम गरिरहनु पर्ने र त्यसका लागि कुनै सहयोग चाहिएमा निर्धक्क निर्देशनालयमा आउन अनुरोध गरे। परिषद्का महासचिव शिवहरि सुवेदीले संयोजन र सञ्चालन गरेको उक्त कार्यक्रममा स्वागत मन्तव्य वरिष्ठ उपाध्याय विक्रम पौडेलले दिएको परिषद्का सचिव शशी शिशिर ढुङ्गानाले जानकारी दिए ।