पोखरा ।

‘पुर्खाको थलो’ चलचित्र जेठ ३ गते पोखरास्थित श्री कृष्ण चलचित्र मन्दिरमा प्रदर्शन हुने भएको छ। ओम प्रकाश गुरुङको लेखन, सम्पादन र निर्देशन रहेकाे चलचित्र मुनाल फिल्म प्रालिको व्यानरमा बनेको हो । मुनाल फिल्म ब्यानरको निर्माण भएको यो आठौँ चलचित्र हो।

निर्देशक गुरुङले देश छाडेर बिदेसिने प्रवृत्तिले गहिरो सामाजिक परिवर्तन ल्याइरहेका बेला, त्यसको भावनात्मक प्रभाव र आफ्नो पहिचानप्रतिको सम्झनालाई समेट्दै चलचित्र निर्माण गरेको बताएका छन् । निर्मात्री कुबिना गुरुङले चलचित्रले पुर्खा–प्रेम र थलोप्रतिको आत्मीय सम्बन्धलाई उजागर गर्ने दाबी गरेकी छिन् ।

निर्माणमा कुबिना गुरुङसँगै दिल घले, उत्तरबहादुर गुरुङ, खिमकुमारी गुरुङ र जोगमाया गुरुङ छन् । पिटर गुरुङ, खेमेन्द्र गुरुङ र जलन गुरुङले छायाँकनको काम सम्हालेका छन्। गणेशमान घले, लक्ष्मी गुरुङ, ओमप्रकाश गुरुङमा मुख्य भूमिकामा छन् । चलचित्रमा डिबी गुरुङ, लालशोभा गुरुङ, गणेश गुरुङ, सुस्मा गुरुङ, उत्तरबहादुर गुरुङ, कविता गुरुङ, अमिर गुरुङ, खिमकुमारी गुरुङ, राजेन्द्र अधिकारी, गमबहादुर गुरुङ, जोया गुरुङ, सुनदेवी गुरुङ लगायतका कलाकारको पनि अभिनय छ ।

गुरुङ चलचित्र उद्योगमा छोटो समयमै प्रभाव छोड्न सफल ओम प्रकाश गुरुङ लामो समयपछि पर्दामा देखिएका छन्। उनको यो चौँथो चलचित्र हो।

चलचित्रको प्रकाशन व्यवस्थापन सरोज गुरुङ, गोपी गुरुङ र यम गुरुङले गरेका छन्। भेषभूषा गोमा गुरुङले तयार गरेकी हुन् भने श्रृंगार राजकुमार गुरुङ र जय गुरुङको रहेको छ। पार्श्व संगीत बिनोद रसाइलीले दिएका छन्, र संगीत संयोजन गमबहादुर गुरुङ (गोरे) र बिनोद रसाइली नै ले गरेका हुन् । नृत्य निर्देशन नेत्रबहादुर गुरुङले गरेका छन् । ड्रोन छायाँकन सन्देश गुरुङ, सूर्य सुनुवार र पुष्कर थापाले सम्हालेका छन्।

निर्माण पक्षका अनुसार, नेपालमा प्रदर्शनपछि चलचित्रको अन्तर्राष्ट्रिय प्रदर्शन पनि हुनेछ। जुन १ तारिख हङकङ र बेलायतमा, र जुलाई ६ तारिख जापानको योकोहामा शहरमा प्रदर्शन हुने जानकारी दिएकाे छ।