पोखरा ।
जननेता मदन भण्डारी र कुशल संगठक जीवराज आश्रितको ३२ औं स्मृति दिवसको सन्दर्भमा शुक्रबार मदन भण्डारी फाउण्डेशनले प्रकाशन गरेको पुस्तक मार्गदर्शन भाग २ को विमोचन र मार्गदर्शन भाग १ को परिचर्चा गरिएको छ ।

मदन भण्डारी फाउन्डेसन कास्कीले आयोजना गरेको कार्यक्रममा मार्गदर्शन भाग २को नेकपा (एमाले)का उपाध्यक्ष युवराज ज्ञवाली, केन्द्रीय सदस्यहरु चूडामणि जंगली, इन्द्रलाल सापकोटा लगायतका नेताहरुले विमोचन गरे । मार्गदर्शन भाग १ को नीति तथा योजना आयोगका पूर्व सदस्य डा अञ्चला चौधरी र युवा विश्लेषक त्रिवेणी लगायतले परिचर्चा गरे ।

एमाले उपाध्यक्ष ज्ञवालीले जननेता मदन भण्डारीले प्रतिपादन गरेको जनताको वहुदलीय जनवाद ‘जबज’ले नेपालका भौगोलिक विशेषता, भाषाभाषी जातजाति लगायतका विविधतालाई सम्बोधन गरेको बताए । नेता भण्डारी नेपाली कम्युनिस्ट आन्दोलनका युगप्रवर्तक नेता भएको उल्लेख गर्दै उनले भण्डारीले जबजको नवीन विचारधाराको निर्माण गर्नुका साथै सिद्वान्त र व्यवहारको सन्तुलनमार्फत राजनीतिमा वैचारिक स्पष्टता ल्याउने काम गरेको जानकारी दिए ।

‘खुला प्रतिस्पर्धाबाट श्रेष्ठता हासिल गरी जनमुखी कार्यक्रमलाई ध्यान दिने जबजको मुल मर्म हो, ‘उपाध्यक्ष ज्ञवालीले भने, ‘जबज नेपालको परिवेश र क्रान्तिको चरित्र सुहाउँदो भएकाले लागू गर्न सकिन्छ ।’ उनले जबजको १४ मुख्य विशेषता एमालेका नेता कार्यकताको लागि महत्वपूर्ण र दुरगामी महत्व राख्ने चर्चा गरे ।

उनले अहिले सबै राजनीतिक दल जबजलाई मार्गदर्शक मानेर अघि बढेको दाबी गरे । उनले नेपालमा कम्युनिस्ट पार्टी खुला समाज तथा बहुदलीय प्रतिस्पर्धालाई आधार मानेर राज्य सत्तामा पुगेर प्रगतिशील सुधारको काम गरेको जानकारी दिए ।

कार्यक्रममा एमालेका केन्द्रीय सदस्य तथा कास्कीका इन्चार्ज कृष्ण थापाले जब राजनीति स्वार्थ, अवसरवाद र व्यक्तिवादमा केन्द्रीत हुन थालेको परिवेशमा मदन भण्डारीको आदर्श झनै सान्दर्भिक हुने बताए । नयाँ पुस्ताले मदनको विचारबाट शिक्षा लिनुपर्ने उल्लेख गर्दै उनले मदन जस्तै सिद्धान्तमा अडिक भएर व्यवहारमा प्रगतिशील बन्नु आजको आवश्यकता भएको चर्चा गरे ।

पार्टीका केन्द्रीय सदस्य ईन्द्रलाल सापकोटाले मदन भण्डारीले प्रतिपादन गरेको विचारले अहिले पनि समाज परिवर्तनको यात्रामा प्रेरणा दिएको बताए । मदनको आदर्श र शिक्षालाई जीवनमा उतार्न पर्ने चर्चा गर्दै उनले समतामूलक र न्याय संगत र लोकतान्त्रिक समाजवादको निर्माणमा लाग्नु नेता तथा कार्यकर्ताको दायित्व भएको उल्लेख गरे ।

उनले मदनले प्रतिपादन गरेको विचारधाराको स्मरण गर्दै वर्तमान सन्दर्भमा त्यसको सान्दर्भिकतालाई स्थापित गर्नु सबैको कर्तव्य भएको बताए । एमाले गण्डकी प्रदेश कमिटीका सचिव धनञ्जय दवाडीले संविधानको सर्वोच्चता, बहुलवादी खुला समाज, शक्ति पृथकीकरणको सिद्वान्त, मानव अधिकारको रक्षा, बहुदलीय प्रतिस्पर्धात्मक प्रणाली जबजको मुख्य विशेषता भएको चर्चा गरे । उनले विश्वव्यापी रुपमा कम्युनिस्ट आन्दोलन रक्षात्मक ठाउँमा पुग्दा जवजले नेपालमा कम्युनिस्ट पार्टीलाई शीर्ष स्थानमा पुर्‍याएको दाबी गरे ।

मदन भण्डारी फाउन्डेसन कास्की अध्यक्ष माधव बास्तोलाले जननेता भण्डारीका दर्शन, विचार र योगदानलाई जनतासमक्ष पुर्‍याउने काम फाउन्डेसनले गरेको बताए । मदनले कम्युनिस्ट आन्दोलनमा पुर्‍याएको योगदानको वहस पैरवीको काममा फाउन्डेसनले ध्यान दिएको उनले उल्लेख गरे । कार्यक्रममा मदन भण्डारी फाउन्डेसन कास्की सचिव सूर्य भण्डारी, अखिल नेपाल महिला संघ कास्की अध्यक्ष गीता विश्वकर्मा लगायतले नेपालको लोकतान्त्रिक आन्दोलनमा मदन भण्डारीको योगदानको चर्चा गरे ।