पोखरा । नेपाल उद्योग वाणिज्य महासंघ गण्डकी प्रदेश समिति र वालिङ उद्योग वाणिज्य संघको संयुक्त रुपमा प्लम्बिङसम्बन्धी १२ दिने (६० घण्टे ) क्षमता अभिवृद्धि तालिम सञ्चालन गरेका छन् । हेल्भेटास नेपालको प्राविधिक सहयोगमा सञ्चालित दिगो र सम्मानित रोजगारीका लागि सीप (इन्स्योर) परियोजनाको दोस्रो सीप स्तरोन्नति तालिम कार्यक्रममा २० जनाको सहभागिता छ ।

तालिममा कमल गैर र सहायक प्रशिक्षक प्रकाश खनालले सहजीकरण गरेको नेपाल उद्योग वाणिज्य महासंघ गण्डकी प्रदेशका कार्यालय प्रमुख निशान खनालले जानकारी दिए । गण्डकी प्रदेश सभाका पुर्व सदस्य मोहन रेग्मीले तालिमको उद्घाटन गर्दै उद्यमशीलता विकास र स्वरोजगार बन्नका लागि तालिमले सहयोग पुग्ने बताए ।

कार्यक्रममा बिरुवा गाउँपालिका अध्यक्ष सूर्यबहादुर कुँवरले श्रमिक र स्वरोजगार व्यवसायीको लागि समयसापेक्ष रुपमा सीपमूलक तालिम आवश्यक पर्ने उल्लेख गरे । नेपाल उद्योग वाणिज्य महासंघ गण्डकी प्रदेश समितिका निवर्तमान अध्यक्ष सञ्जीवबहादुर कोइराला, सल्लाहकार लक्ष्मीप्रसाद त्रिपाठी वालिङ उद्योग वाणिज्य संघका अध्यक्ष चेतनारायण श्रेष्ठ लगायतले तालिमको उपदेयताबारे बोलेका थिए ।