पोखरा ।

नेपाल कम्युनिष्ट पार्टी (एकीकृत समाजवादी) पोखरा महागरपालिकाको अधिवेशन जेठ १५ गते हुने भएको छ ।

नेकपा एस पोखरा महानगर कमिटीले मंगलबार पोखरामा पत्रकार सम्मेलन गरी पहिलो अधिवेशन पोखरामा हुने जानकारी दिएको हो । पार्टी निर्माण, वैचारिक सुदुढिकरण सांगठनिक विस्तारका दृष्टिले यो अधिवेशन ऐतिहासिक र दिशानिर्देशक बन्ने नेकपा एस पोखरा महानगर कमिटीका अध्यक्ष प्रेम थापाले बताए । अधिवेशनको तयारी तिब्र पारिएको उनले सुनाए ।

अधिवेशनमा पोखरा महानगरका ३३ वटै वडाबाट प्रतिनिधि सहभागी हुने अध्यक्ष थापाले बताए । ‘पोखरा महानगरमा २५/२६ सय पार्टी सदस्यहरु हुनुहुन्छ त्यसैका आधारमा प्रतिनिधि टुंगो लाग्छ,’ उनले भने, ‘प्रत्येक वडाबाट ५/५ जनाका दरले सहभागी हुनुहुनेछ । त्यसमा आयोजक कमिटीको सदस्य हुने नै भयो ।’ उनका अनुसार प्रत्येक वडाबाट आएका १ सय ६५ सहित आयोजक ८० सहित २ सय ४५ प्रतिनिधि अधिवेशनमा सहभागी हुने प्रष्ट्याए ।

नेकपा एस पोखरा महानगर कमिटीले मंगलबार नै महानगरपालिकाका जनाताका माग र समस्या सम्बोधन गर्नका लागि र विकासका काममा ध्यानाकर्षण गराउँदै पोखरा महानगरपालिकाका मेयर धनराज आचार्यलाई माग पत्र बुझाएको थियो । बजेट निर्माणका क्रममा जनचाहनाको विषयबस्तु नछुटुन भनेर ध्यानाकर्षण पत्र बुझाएको उनले सुनाए ।
संघीय, प्रदेश र स्थानीय सरकारलाई माग पत्र बुझाउने पार्टीको कार्यक्रम अन्तर्गत पोखरा महानगरमा पनि ध्यानाकर्षण गरिएको अध्यक्ष थापाले बताए । पोखरामा बुझाइएको पत्रमा विभिन्न ६३ वटा माग रहेका छन् ।