पोखरा ।

गणतन्त्र दिवसको पावन अवसरमा बिहीबार पोखरा महानगरपालिका अन्तर्गत वडा नं. १३ मा रहेको भद्रकाली माध्यमिक विद्यालय कुँडहर मा कक्षा १० मा अध्ययनरत विद्यार्थीहरूका लागि गणतन्त्र दिवस, विद्यार्थी र हाम्रो दायित्व विषयक अन्तरक्रिया गरिएको छ ।

कार्यक्रममा विद्यालयका सामाजिक अध्ययन शिक्षक राजेन्द्र भण्डारीको अध्यक्षतामा सुरू भएको अन्तरक्रिया कार्यक्रममा गणतन्त्रको अवधारणा, नागरिक कर्तव्य तथा विद्यार्थीहरूले निर्वाह गर्नुपर्ने सामाजिक जिम्मेवारीबारे छलफल गरे ।

कार्यक्रमका प्रमुख अतिथि तथा स्रोत व्यक्ति इतिहासविद डा. ज्ञानबहादुर कार्कीले गणतन्त्रको इतिहास, नेपालमा यसको स्थापनाको पृष्ठभूमि र गणतन्त्रबाट नागरिकले प्राप्त गरेका अधिकारबारे प्रकाश पारे । गणतन्त्रलाई बलियो, सबल र संस्थागत बनाउनका लागि हामी सबै मिलि हातेमालो गर्दै देश विकासमा जुट्नु पर्ने उनको भनाइ थियो ।

विद्यार्थीहरूले सचेत, जिम्मेवार र अनुशासित नागरिकका रुपमा आफुलाई तयार पार्नुपर्ने कुरामा उनले जोड दिए । कक्षा १० मा अध्ययनरत विद्यार्थीद्वारा आयोजित कार्यक्रमको समापन गर्दै  अध्यक्षता गरेका शिक्षक राजेन्द्र भण्डारीले धन्यवाद ज्ञापन गर्दै यस्ता गतिविधिहरूले विद्यार्थीको समग्र शैक्षिक विकासमा योगदान पुर्‍याउने बताए । आगामी दिनमा अझै यस्ता रचनात्मक कार्यलाई कक्षाकोठाबाट अगाडि वढाउदै लैजाने योजना उनले सुनाए ।