लेखनाथ ।
त्रिवेणी इन्टरनेशनल कलेज, पोखरा–२७ का पूर्वविद्यार्थीहरूको संस्था त्रिवेणी इन्टरनेशनल कलेज एलुम्नाई एसोसिएसनको अध्यक्षमा असीम पाण्डे निर्वाचित भएका छन् ।

एसोसिएसनको शनिबार सम्पन्न तेस्रो साधारण सभा तथा दोस्रो अधिवेशनले पाण्डेको नेतृत्वमा ९ सदस्यीय कार्यसमिति चयन गरेको हो । समितिको उपाध्यक्षमा सर्वेन्द्र न्यौपाने, सचिवमा सृजना अधिकारी, सहसचिवमा सुजन आचार्य र कोषाध्यक्षमा पविन गौतम निर्वाचित भएका छन् । त्यसैगरी, समितिका सदस्यहरूमा सचिन रानाभाट ‘बलराम’, सृष्टि तिवारी, सलिना घिमिरे र सिमरन रेग्मी निर्वाचित भएका छन् ।

यसअघि अधिवेशनको उद्घाटन गर्दै त्रिवेणी इन्टरनेशनल कलेजका सञ्चालक समितिका अध्यक्ष सुमन भट्टराईले कलेजमा अध्ययनरत विद्यार्थीहरूलाई पारिश्रमिकसहितको इन्टर्नशिपको सुविधा उपलब्ध गराउनुपर्नेमा जोड दिए । कलेजबाट अध्ययन पूरा गरेका विद्यार्थीहरू बजारको पहिलो रोजाइमा पर्ने जनशक्ति भएको उल्लेख गर्दै अध्यक्ष भट्टराईले शैक्षिक गुणस्तरमा कुनै सम्झौता नगर्ने बताए । उनले कलेज निजी क्षेत्रबाट सञ्चालित भए पनि न्यूनतम शुल्कमा गुणस्तरीय शिक्षा प्रदान गरिएको बताए । साथै, पूर्वविद्यार्थीहरूलाई कलेजले सिकाइ केन्द्रका रूपमा विकास गरी उनीहरूको सीप र ज्ञान हस्तान्तरण गर्नुपर्नेमा जोड दिए ।

त्यस्तै, कलेजका पूर्वअध्यक्ष बाबुराम गिरीले पूर्वविद्यार्थी मञ्च कलेजको अभिन्न अङ्ग भएको उल्लेख गर्दै शैक्षिक उन्नयनमा यसको महत्त्वपूर्ण भूमिका रहेको बताए । उनले त्रिभुवन विश्वविद्यालयबाट सम्बन्धन प्राप्त थप कार्यक्रमहरू सञ्चालन गर्न अनुमति लिइने जानकारी दिए ।

कार्यक्रममा कलेजका क्याम्पस प्रमुख यदुराज आचार्य, सञ्चारकर्मी नवराज सापकोटा, विद्यार्थी कल्याणकारी समितिका अध्यक्ष सुदिन भट्टराईलगायतले शुभकामना मन्तव्य व्यक्त गरेका थिए ।

यसैबीच, त्रिवेणी इन्टरनेशनल कलेज एलुम्नाई एसोसिएसनका अध्यक्ष रामकृष्ण लामिछानेले अध्यक्षको प्रतिवेदन र कोषाध्यक्ष सृजना अधिकारीले कोषाध्यक्षको प्रतिवेदन प्रस्तुत गरेका थिए । कार्यक्रमको सञ्चालन सचिव असीम पाण्डेले गरेका थिए ।