लेखनाथ ।

बालबालिका, स्वास्थ्य र प्रकृतिका लागि ज्ञान तथा वकालत सञ्जाल (कञ्चन) संस्थाले शनिबार आफ्नो पहिलो स्थापना दिवसको अवसर पारेर विद्यार्थीहरूका लागि शैक्षिक सामग्री सहयोग गरेको छ ।

संस्थाले सामाजिक उत्तरदायित्व अन्तर्गत पोखरा महानगरपालिका–२६ स्थित अमरज्योति आधारभूत विद्यालयमा अध्ययनरत विद्यार्थीहरूका लागि शैक्षिक सामग्री तथा इसिडी सामग्री वितरण गरेको हो ।

विद्यार्थीहरूको पठनपाठनमा सहयोग पुग्ने उद्देश्यले गरिएको सो कार्यक्रमको अवसरमा पोखरा महानगरपालिका वडा नं २६ की वडा सदस्य सुजाता सुनार बरालले नवस्थापित संस्थाले विद्यालयमा गरेको सहयोग उदाहरणीय भएको र अन्य संस्थाहरूका लागि समेत प्रेरणादायक हुने बताइन् ।

संस्थाका अध्यक्ष अमर पौडेलको अध्यक्षतामा सम्पन्न उक्त कार्यक्रममा विद्यालयकी प्रधानाध्यापक सत्यदेवी बराल, संस्थाका कार्यकारी निर्देशक सागर सुनुवार, सचिव नम्रता कोईराला, विद्यालय व्यवस्थापन समितिका अध्यक्ष मनबहादुर रानाभाट, अक्षयकोषदाता दीर्घनाथ वराललगायतले संस्थाले सामाजिक क्षेत्रमा गरेका कार्य र त्यसले समाजमा पारिरहेको सकारात्मक प्रभावबारे आ–आफ्नो धारणा प्रस्तुत गरेका थिए ।