जोमसोम ।
मुस्ताङको घरपझोङ गाउँपालिका ५ स्थित कैसाङमा रहेको सैनिक उच्च शिखर शिक्षालयमार्फत हालसम्म ‘हाई अल्टिच्युड तथा माउन्टेन वारफायर’सम्बन्धी तालिम लिएका नेपालसहित २४ राष्ट्रका ३३८ सैनिक शिक्षार्थी दीक्षित भएका छन् ।

मुस्ताङमा बर्सेनि हाई अल्टिच्युड तथा माउन्टेन वारफायर सम्बन्धी आधारभूत तथा एडभान्स तालिम सञ्चालन हुने गरेको छ । मुस्ताङमा हाइ अल्टिच्युड तथा माउन्टेन वारफायर तालिम सञ्चालनका लागि नेपाली सेनाको जंगी अड्डाले २०३२ मा सैनिक उच्च शिखर शिक्षालय स्थापना गरेको थियो ।

यहाँ विभिन्न राष्ट्रका करिब ७ हजार जनाले आधारभूत तालिम प्राप्त गरिसकेको र २ हजार ५ सय जनाले हाई अल्टिच्युड तथा माउन्टेन वारफायरसम्बन्धी एडभान्स तालिम लिएको सैनिक जनसम्पर्क निर्देशनालयका प्रवक्ता राजाराम बस्नेतले जानकारी दिए । तालिम प्राप्त गरेका शिक्षार्थीमध्ये ५१ जनाले ८ हजार मिटरभन्दा माथिका हिमाल आरोहरण गरिसकेका छन् । तीमध्ये २९ जनाले सगरमाथा हिमालको आरोहण गरिसकेका छन् ।

मुस्ताङमा एडभान्स तालिम कोर्सबाट दीक्षित शिक्षार्थीलाई हिमाल आरोहणका लागि उत्पादन गर्ने गरिएको छ । नेपाली सेनाले बर्सेनि यस प्रकारको आधारभूत तथा एडभान्स तालिम सञ्चालन गर्ने गरेको छ । जोमसोमस्थित कालीगण्डकी नदीमा बन्दोबस्तीका सामान प्रयोग गरी शिक्षार्थीलाई रिभर क्रसिङका विभिन्न विधाको अभ्यास गराइएको छ ।