पोखरा ।
सुदूर पश्चिम प्रज्ञा प्रतिष्ठानले पोखरेली स्रष्टा माधव वियोगी र प्राडा रामचन्द्र पोखरेललाई धनगढीमा आइतबार सम्मान गरेको छ । अन्तर्राष्ट्रिय साहित्य सम्मेलनमा उनीहरूलाई पहलमानसिंह स्वाँर राष्ट्रिय सम्मान २०८२ प्रदान गरिएको हो ।

सुदूर पश्चिम प्रदेशका मुख्यमन्त्री कमलबहादुर शाह र पूर्व मुख्यमन्त्री राजेन्द्रसिंह राउतले सम्मान गरेका हुन् । वियोगीले छन्द र महाकाव्यका अभियानमार्फत् नेपाली भाषा, साहित्यको विशिष्ट सेवा गरेकाले र प्राडा पोखरेलले नेपाली नाटकको विकासमा अनुसन्धानका माध्यमबाट पूर्वजको सम्मान गरेबापत सो सम्मान प्रदान गरिएको हो ।

कार्यक्रममा सुपका प्रतिभालाई पनि सम्मान गरिनुका साथै साँस्कृतिक कार्यक्रमको प्रदर्शन गरिएको थियो । प्रतिष्ठानका उपकुलपति टिएन जोशीले विशिष्ट स्रष्टालाई सम्मान गर्न पाएकोमा खुसी व्यक्त गरे ।